སྲོང་བཙན་སྔོན་དུ་བོད་ལ་ཡི་གེ་ཡོད་མེད་སྐོར་གླེང་བ།
སྲོང་བཙན་སྔོན་དུ་བོད་ལ་ཡི་གེ་ཡོད་མེད་སྐོར་གླེང་བ།
རྩོམ་པ་པོ། ནས་སོན།
བསྡུས་གླེང་བ། གངས་ཅན་བོད་དུ་ཡི་གེ་ནམ་བྱུང་མིན་ཐད་ལ་སྔོན་བྱོན་མཁས་པའི་བཞེད་པ་མི་འདྲ་བ་གཉིས་མཆིས་ཏེ། དང་པོ། ཐོན་མིའི་སྔོན་ལ་ཡི་གེ་ཡོད་པ་མདོ་ཙམ་ཞུས་ན། ཞང་ཞུང་ནི་ཁ་བའི་ལྗོངས་ཀྱི་ཤེས་བྱའི་ཆུ་ཀླུང་གིས་འཁྱིལ་བར་བྱེད་པའི་ཆུ་འགོ་ཡིན་ཞིང་། བོད་མི་རིགས་ཀྱི་ཤེས་དཔལ་ཡོངས་སུ་མངོན་པར་བཞེད་པའི་རྩ་བ་ཐོག་མར་ཚུགས་ས་དེ་ཡིན། བོད་ཀྱི་ལོ་རྒྱུས་ཐོག་གལ་ཆེའི་གནས་བབ་དུ་འཁོད་པའི་རྒྱལ་ཕྲན་ཞིག་ཡིན་ལ་བོད་ཀྱི་ཡིག་སྲོལ་ཐོག་མ་དབུ་བརྙེས་ཡུལ་ཡང་ཡིན། སྐབས་འདིར་ཞང་ཞུང་གི་ལོ་རྒྱུས་ཞིབ་ཕྲ་ཇི་ཡིན་དཔྱད་འགྲེལ་བྱེད་པ་སྐབས་བབས་ཀྱི་བརྗོད་དོན་མ་ཡིན་པས་གཞན་ལ་གཟིགས་པར་མཛོད་ཅིག སྔོན་ཐོན་གྱི་ཚུལ་དུ་གནས་པའི་རྒྱལ་ཕྲན་ནི་ཞང་ཞུང་ཡིན་པས་བོད་ཀྱི་ཡི་གེའི་སྲོལ་ཐོག་མ་དེ་ཡང་ཞང་ཞུང་དུ་བྱུང་ཡོད། དེ་ཡང་ཡི་གེའི་སྲོལ་ཐོག་མར་ཞང་ཞུང་དུ་དར་བ་དེ་ནི་ལོ་རྒྱུས་དང་སྤྱི་ཚོགས་ཀྱི་མཐུན་རྐྱེན་མང་པོ་ཞིག་འདུས་པ་ལས་བྱུང་བའི་འབྲས་བུ་ཞིག་ཡིན་པ་ལས་སྟེས་དབང་གི་དར་བ་ཞིག་མ་ཡིན། ལོ་རྒྱུས་ཐོག་ཞང་ཞུང་ཞེས་འབོད་པའི་རྒྱལ་ཕྲན་འདིའི་གནས་ཡུལ་གཙོ་བོ་ནི་དབུས་ལྷ་ལྡན་ཞིང་གི་ནུབ་ཕྱོགས་སུ་འཛམ་གླིང་ཡང་རྩེར་གྲགས་པའི་མངའ་རིས་སྐོར་གསུམ་གྱི་རྒྱུད་དུ་ཡིན། དེ་ལྟར་ནའང་གཤེན་རབ་མི་བོ་ཆེས་བོན་བསྟན་ཅིང་། ཡི་གེའི་སྲོལ་ཐོག་མ་གསར་དུ་གཏོད་མཛད་པའི་ལོ་རྒྱུས་ཕལ་མོ་ཆེའི་ནང་དུ་འཁོད་འདུག་པས་ཞང་ཞུང་ཡི་གེ་བྱུང་པའི་ཚུལ་ངེས་པར་དུ་ལབ་ཆོག་པའི་བདེན་དཔང་འདུག་གོ། བོན་གཞུང་མང་པོའི་ནང་དུ་ཡི་གེའི་ཐོག་མ་སྟག་གཟིག་སྤུངས་ཡིག་ཟེར་བ་དེ་ཡིན་ཚུལ་གསལ་བ་སྟེ། «ལེགས་བཤད་རིན་པོ་ཆེའི་གཏེར» ལས་“དང་པོ་དག་པ་ལྷའི་ཡི་གེ་སྟག་གཟིག་སྤུངས་ཡིག་ཏུ་བསྒྱུར། དེ་ཞང་ཞུང་ཡིག་རྒན་དུ་བསྒྱུར། དེ་སྨར་སྦྲག་ཏུ་བསྒྱུར། དེ་སྨར་ཆེ་ཆུང་དུ་བསྒྱུར། ཤོག་གྲངས། ༡༥༩ ཞེས་གསུངས་པ་ལྟར་བོན་གཞུང་སྣ་ཚོགས་དང་ཡོངས་གྲགས་མཁས་པས་གཅིག་ཏུ་བཞེད་དོ།། « མདོ་གཟེར་མིག » ལས “ ཡིག་འབྲུ་སུམ་ཅུས་བོན་གྱི་ཁོག་པ་ཕུབ། འགོ་ཡིས་ལམ་དྲངས་ཤད་ཀྱིས་མདོ་ཡང་བཅད། ཚེག་གིས་བར་ཕྱེ་མི་འཁྲུགས་གསལ་བར་བསྙམས། གུག་འགྲེང་ན་རོ་ཞབས་ཀྱུ་ཡ་ར་ཏ། སྐབས་སྦྱོར་དོན་དུ་ཡན་ལག་རྒྱས་པར་བཏགས། ཞེས་དང་། «སྲིད་པ་སྤྱི་མདོས» ལས“ གཤེན་ཆེན་པོ་གཅེ་འོད་ནས་རིམ་པར་བརྒྱུད་པ། སངས་པོ་ཁྲི་ན་ཁོད་བདག་གིས་ཡི་གེར་བཏབ་པ། ཞེས་དང་ «ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད» ལས“ བོད་ཀྱི་ཡི་གེ་ཡང་ཁྲིམ་སོ་བུད་བཙན་པོའི་རིང་ལ་བྱུང་བར་འདོད་པ་ཡང་ཡོད་དོ། ཞེས་གསུངས་པ་ལྟར་མང་དུ་གསལ་བར་བསྟན་འདུག་པས་སྐབས་འདིར་ཡིག་ཚོགས་ལ་འཇིགས་ནས་མ་བྲིས་སོ།། གཉིས་པ། ཐོན་མིས་བོད་ཡིག་ལ་གསར་གཏོད་མཛད་བཅས་པ་ནི་ལེགས་སྦྱར་གྱི་ཡི་གེ་ལ་དཔེ་བྱས་ནས་གསར་དུ་བཟོས་ཞེས་པ་དེ་ཡང་། ལཉྫ་ལ་དཔེ་བྱས་ནས་བོད་ཀྱི་ཡི་གེ་དབུ་ཅན་དང་ཝརྟུ་ལ་དཔེ་བྱས་ནས་བོད་ཀྱི་ཡི་གེ་དབུ་མེད་བཟོས་ཞེས་གྲགས་པ་དེ་ཡང་ཅུང་ཟད་སྐྱོན་དུ་འབབས་ཏེ་སྙམ། དཔེར་ན། «བོད་ཀྱི་ལོ་རྒྱུས་བཻ་རོའི་འདྲ་འབག་ཆེ་མོ» ལས་“ རྒྱ་གར་མཁས་པ་ལི་བྱིན་སྤྱན་དྲངས།། ཐོན་མི་སམྦྷོ་ཊས་ཡི་གེ་བསྒྱུར།། ཞེས་གསུངས་འདུག་པ་ལས་ཀྱང་བོད་ལ་སྔོན་ནས་ཡི་གེ་ཡོད་པར་གསལ་བས་སོ།།
«ཐང་ཡིག་གསར་རྙིང་» གཉིས་ཀྱི་ནང་དུ་སྲོང་བཙན་སྔོན་དུ་བོད་ཀྱི་ལོ་རྒྱུས་བཤད་སྐབས་སུ་“ སྲོང་བཙན་གྱིས་长孙无忌 རྒྱུད་དེ་གོང་མར་ཡི་གེ་ཕུལ་ཏེ་“ གནམ་གྱི་སྲས་ཁྲིར་བཞུགས་མ་ཐག་ཡིན་པས། འོག་ཏུ་གློ་བ་རིང་བ་འདྲ་བྱུང་ན།། ཁོ་བོས་དམག་དྲངས་ཏེ་གྲོགས་ཏན་བྱས་ཆོག་ “ ཅེས་སྲོང་བཙན་དུས་སུ་བོད་ལ་ཡི་གེ་ཡོད་པ་གསལ་པོ་ཤེས་ཐུབ། དེར་བརྟེན་བོད་ཡིག་ནི་བོད་རང་གིས་བཟོས་པ་ལས་མི་རིགས་གཞན་གྱིས་སློབ་པ་དང་གསོལ་རས་གནང་བ་སྟེ་བསྒྱུར་བ་སོགས་གཏན་ནས་མ་ཡིན་ནོ།། སྲོང་བཙན་གོོང་དུ་ཞང་ཞུང་ལ་ཡི་གེ་མེད་ཟེར་དགོས་པའི་རྒྱུ་རྐྱེན་ཅུང་ཟད་བཤད་ན། དུས་རབས་བཅུ་གསུམ་པའི་སྐབས་སུ་བོད་ལ་ཆོས་སྲིད་ཟུང་འབྲེལ་ལམ་ལུགས་བྱུང་བ་ནས་འགོ་བཙུགས་ཏེ། བོད་ཀྱི་ཤེས་རིགས་ཡོངས་སུ་ཁུངས་རྒྱ་གར་ལ་གཏུགས་ཅི་ཐུབ་འབའ་ཞིག་བྱས་པ་དང་བོད་མིའི་འབྱུང་ཁུངས་ལམ་དང་ལུགས་སྲོལ་ཡོངས་སུ་རྒྱ་གར་དུ་གཏུགས་ཅི་ཐུབ་མཛད་དོན་ནི། སྐབས་དེའི་ཆབ་སྲིད་ཀྱི་དགོས་མཁོ་སྒེར་སེམས་ལྟ་སྟངས་ལས་བོད་ཀྱི་བྱུང་བ་རིག་པ་དངོས་མ་ཡིན་པར་ཤིན་ཏུ་གསལ་ལོ།། གཞན་ཡང་མངའ་རིས་རྩ་མདའ་རྗོང་གི་ས་ཆའི་བྲག་ངོས་ཤིག་ན་རི་མོ་སྣ་ཚོགས་དང་སྨར་ཡིག་གི་རྗེས་ཤུལ་རྙེད་པ་དེ་ནི་ལོ་ངོ་སུམ་སྟོང་ཡས་མས་སོང་ཡོད་སྐད། གནའ་རྫས་རྟོག་ཞིབ་པས་བཤད་པ་ལྟ་བུ་སོགས་དུ་མ་ཡོད་ཅིང་། དེས་ན་ལོ་རྒྱུས་ཞེས་པ་དྲང་བདེན་འབའ་ཞིག་བཤད་རྒྱུ་མ་གཏོགས་ཕྱོགས་ལྷུང་གཏན་ནས་མི་རིགས་སྙམ། འོ་ན་ཐོན་མི་བཀའ་དྲིན་མི་ཆེའམ་ཞེ་ན་དེ་ཡང་ཤིན་ཏུ་བཀའ་དྲིན་ཆེ་སྟེ། དཔེར་ན། བོད་རང་ཉིད་ཀྱི་སྐད་དང་མཐུན་པའི་བརྡ་སྤྲོད་རིག་པ་ཆ་ཚང་བ་ཞིག་མཛད་ཡོད་པ་མ་ཚད་སྤྱིར་ནང་བསྟན་དང་སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་སོགས་སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་སོགས་བསྒྱུར་ཡོད་པས་མཛད་རྗེས་བླ་ན་མེད་པ་ཞིག་བཞག་ཡོད་པ་ནི་ད་ལྟའི་བར་དུ་མཐོང་ཆོས་དངོོས་ཡིན་ནོ།།
༢༠༡༩/༤/༢༢ ནས་སོན་གྱིས།