དགེ་རྒན་གྱི་དྲིན་གླེང་བ།

སྐད་འཕྲིན་བརྒྱུད་ནས་མཐོ་འབྲིང་དགེ་རྒན་ཚེ་སྐྱོང་ལ་ཕུལ་བ།

(མཚོ་ལྷོ) ལྕང་སྐྱེས་ཨ་བུ།

      དགེ་རྒན་ལགས། བདེ་མོ་ཡིན་ནམ། སང་ཉིན་ནི་ཁྱེད་དང་ང་ཡི་དུས་ཆེན་ཡིན་པས། རྒྱང་ཐག་རིང་པོའི་བྱ་གཞུང་ན་ཡོད་པའི་བུ་སློབ་རྟ་མགྲིན་ཚེ་བརྟན་གྱིས་ལྷག་བསམ་དྲོད་མོས་འཚམས་འདྲི་དང་ཞ་ཞོར་དུ་སེམས་གཏམ་ཐན་ཐུན་འགའ་ཡང་གླེང་ན་འདོད་བྱུང་། རྒན་ལགས།   ཁྱོད་ཀྱིས་སྔར་ང་ཚོ་བུ་སློབ་རྣམས་ལ་ལེགས་ཉེས་འབྱེད་པའི་གདམས་པ་དང་། དགེ་སྒྲུབ་སྡིག་སྤོང་ལས་ལ་སྐུལ་བའི་བསླབ་བྱ། སློབ་གསོའི་བྱ་གཞག་སྐྱོང་བའི་ཚད་ཐིགས་སོགས་ཐད་ནས་ཤ་ཚའི་སྙིང་གི་བདུད་རྩིའི་ཐིགས་པ་རེ་རེ་གནང་བྱུང་བར་ཡིད་ལ་དྲན་པས་ཁྱོད་ལ་བཀའ་དྲིན་ཆེས་ཞུ་པ་ཡིན་ལགས།

        དགེ་རྒན་ནི་མིའི་རིགས་ཀྱི་བླ་སྲོག་བསྐྲུན་པ་པོ་རེད། བླ་སྲོག་འདི་ཡོད་པས་ང་ཚོའི་མིའི་རིགས་ལ་དཔལ་ཡོན་ལྡན་པའི་ཤེས་རིག་གི་ཉི་གཞོན་བསུ་ཐུབ་པ་བྱུང་ཡོད། དགེ་རྒན་ནི་མིའི་རིགས་ལ་ཤེས་རབ་ཀྱི་འོད་སྣང་འདྲེན་པའི་རིག་པའི་དཔའ་བོ་ཡིན། རིག་པའི་དཔའ་བོ་དེ་དག་ཡོད་པས་ད་གཟོད་མིའི་རིགས་ཀྱི་འཇིག་རྟེན་འདིར་བདེན་རྫུན་ལེགས་ཉེས་ཀྱི་མིག་ཡོད་པར་གྱུར་ལ། དགེ་སྒྲུབ་སྡིག་སྤོང་དང་ཡག་བཙོག་བཟང་ངན་གྱི་བླང་དོར་འབྱེད་པའི་ཤེས་རབ་རྣོན་པའི་གོ་ཆ་སྤྲས་ཐུབ་ཡོད། དགེ་རྒན་ནི་མུན་པ་སེལ་བའི་སྒྲོན་མེ་ཡིན། མ་གཞི་ནས་ཡངས་བའི་འཇིག་རྟེན་གྱི་ཁམས་ཆེན་པོ་འདི་མུན་པའི་འཇིགས་རུང་གི་བར་སྟོང་ཧ་ཅང་ཆེན་པོ་ཞིག་ཏུ་ངེས། ཡིན་ནའང་ཉི་ཟླ་སྐར་གསུམ་དང་སྒྲོན་མེ་ལ་སོགས་པའི་མ་རིག་མུན་པ་འཇོམས་པའི་འོད་ལྡན་གྱི་དངོས་པོ་འདི་དག་ཡོད་པས་ད་གཟོད་ང་ཚོར་འཇིག་རྟེན་ལྟ་བ་དང་མི་ཚེའི་ལྟ་བ་ཡང་དག་ཞིག་རྙེད་པའི་རྣམ་དཔྱོད་རྣོན་པོའི་སོ་ཁ་ཞུན་བརྡར་ཡང་ཡང་བྱས་ཡོད། དགེ་རྒན་ནི་ཆ་ཡོངས་ནས་སྒྲོན་མེ་ཡིན་མི་སྲིད་ནའང་། དགེ་རྒན་གྱི་བླ་ན་མེད་པའི་གཞན་གཅེས་བློས་གཏོང་གི་བྱ་སྤྱོད་དག་ཕུན་ཚོགས་སྣོད་བཅུད་ལེགས་པར་བསྐྲུན་པའི་ཉི་གཞོན་དང་འདྲ་ལ། མུན་པ་ལེགས་པར་སེལ་བའི་སྒྲོན་མེ་དང་ཀུན་ནས་དཔེ་མཚུངས་པས་སོ།

      དགེ་རྒན། ངའི་སྙིང་གི་སྒྲོན་མེ། ཁྱེད་ཉིད་ང་ཚོའི་འཇིག་རྟེན་ལ་བྱོན་པ་ནས་བཟུང་། ང་ཚོའི་བུ་སློབ་རེ་རེར་རང་ལ་དབང་བའི་མི་ཚེའི་ཡང་དག་གི་ལམ་ཞིག་རྙེད་ཐུབ་ཡོད། ཁྱེད་ཡོད་པས་ང་ཚོའི་བུ་སློབ་ཚོས་མཚན་མོའི་ཅེ་སྤྱང་གིས་བཙན་འཛུལ་དང་འཇིགས་སྐྲག་མྱོང་པའི་འོ་དོད་ཀྱིས་ཞིམ་མངར་ལྡན་པའི་རྨི་ལམ་དཀྲོགས་མ་མྱོང་། ཁྱེད་ཉིད་ཆེད་དུ་མི་ཡུལ་ལ་མངགས་པའི་རྒྱལ་སྲས་བྱང་ཆུབ་སེམས་དཔའ་དེ་ཡིན་ཙ་ན། ང་ཚོའི་སློབ་བུ་བཞི་ཅུ་ཞེ་བདུན་པོ་རེ་རེའང་རིགས་དྲུག་བདེ་འགྲོར་སྐུལ་བའི་ཕྱོགས་སྐྱོང་གི་ལྷ་ཕྲུག་རེ་རེ་ཅི་ལ་མིན། ལྷ་དང་ལྷ་མོའི་བྱིན་རླབས་ཀྱི་བསུང་ཞིམ་འཐུལ་ས་ན། གཡོ་སྒྱུ་ཁྲམ་གསུམ་འཛོམས་པའི་ཝ་མོ་གནས་འདིར་ཡོང་ས་ག་ལ་ཡོད། བདེན་དོན་ཚུལ་བཞིན་སྲུང་པའི་མི་ཚེའི་རྩ་དོན་ཟིན་པའི་དཀར་འཇམ་གྱི་ཤོག་ངོས་ལ་ཕྱིར་མི་བཟློག་པའི་དམ་བཅའ་སྙིང་གི་ཐེམ་ཀ་ཨ་འཐས་སུ་བརྒྱབ་ཡོད། ཚེ་སྐྱོང་། མི་ཚེ་དྲང་བདེན་འོད་ཀྱིས་སྐྱོང་བའི་མི་བུ་ཞིག   ཁྱོད་ཀྱིས་ང་ཚོར་མི་བུ་ཇི་ལྟར་བཅའ་ཚུལ་གྱི་མི་ཆོས་གནས་ལུགས་ཀྱི་གདམས་པ་བསྩལ་ཡོད། ཁྱོད་ཀྱིས་ང་ཚོར་འཇིག་རྟེན་འདིའི་མི་ཚེའི་འགག་འཕྲང་རིང་མོར་བརྒྱུད་པར་གདོང་ཇི་ལྟར་གཏོད་དགོས་པའི་ཤེས་རབ་ཀྱི་སྙིང་སྟོབས་བགོས་ཡོད། ད་ལྟ་ང་ཚོ་ལ་ང་ཚོར་དབང་བའི་ཁང་ཁྱིམ་དང་ནང་མི་བཟའ་གྲོགས་ཡོད། ཤ་ཆད་བུ་ཕྲུག་ཡོད། ཤ་ཉེ་སྤུན་ཟླ་ཡོད། རྩོལ་སྒྲུབ་ཟླ་ཕོགས་ཡོད། དད་མོས་རིག་གཞུང་ཡོད། ཕན་ཚུན་རྒྱབ་སྐྱོར་བྱེད་པའི་ཡིད་རྟོན་ལས་གྲོགས་ཀྱང་ཡོད། འདི་དག་ཡོད་ས་ན་ང་ཚོར་བདེ་སྐྱིད་རང་དབང་གི་མེ་ཏོག་བཞད་ཡོད།དགོད་འཛུམ་ཁུ་བྱུག་གི་གསུང་སྐད་སྙན་མོ་གྲགས་ཡོད། བྱེའུ་ཕྲུག་ལྟ་བུའི་ང་ཚོ། མེ་ཏོག་ལྗང་ནེམ་ལྟ་བུའི་ང་ཚོ། ང་ཚོ་བྱེའུ་ཕྲུག་ལྟ་བུ་ནས་དབུ་ཚུགས་ཏེ་གནམ་འཕང་བསྟོད་པའི་གཤོག་རྩལ་གྱི་འཕུར་སྟབས་བསླབས་ཡོད། གྲང་ངར་བུ་ཡུག་རྒོལ་པའི་དཔའ་སྤོབས་ཀྱི་གོ་ཆ་བགོས་ཡོད།   ང་ཚོ་ཆུང་ཆུང་མེ་ཏོག་ནས་བཞད་འགོ་ཚུགས་ཏེ། ཁྱོད་ཀྱི་གསལ་ཟབ་ཡངས་པའི་ཐུགས་རྗེའི་གཤིན་པོའི་ཆུ་ལུད་དྲོད་གཤེར་དང་ཉི་འོད་དྲོད་འཇམ་དག་གི་བྱམས་བརྩེ་ཕྱག་ཟུང་དམ་པའི་འོག   གཞི་ནས་རྨི་ལམ་རེ་བྲང་ལ་གཉེར་ནས་ལམ་ལ་ཆས་འོངས། དགེ་རྒན་ཡ། ངའི་སྙིང་གི་ཉི་མ། ཁ་སང་གི་རེ་སྨོན་སྟོང་གི་འཁྲུལ་པའི་རྨི་ལམ་ཆུང་ཆུང་གི་ས་བོན་དེ་དག་དེ་རིང་གི་ཁ་བ་གངས་ཅན་པའི་ཡུལ་གྲུ་སོ་སོར་ན་རང་རིགས་ལས་དོན་གཉེར་བའི་གདུང་འདེགས་ཀྱི་ཀ་ཆེན་དུ་གྱུར་དང་འགྱུར་བའི་ཉམས་འགྱུར་དག སྙིང་གི་དཔྱིད། མིག་གི་དཔལ་ཅི་ལ་མིན།

རྒན་ལགས། སྔར་ཅི་ཡང་མི་ཤེས་བ་ལང་འདྲ་བ་ང་ཚོ་ད་ལྟ་ཅི་ཡང་ཤེས་ཤིང་རིག་པ་དང་ལྡན་པ། བདེན་རྫུན་ལེགས་ཉེས་འབྱེད་པའི་རྣམ་དཔྱོད་ཀྱི་རིག་པ་དང་ལྡན་པ་ནི་དགེ་རྒན་གྱི་སྐུ་དྲིན་ཡིན་ངེས་ཏེ། དེ་ནི་བ་ལང་མི་ཁྱུར་བཅུག་པའི་ཚོད་རེད། དེ་ཕྱིར་དགེ་རྒན་གྱི་བཀའ་དྲིན་ནི་འཇིག་རྟེན་ན་གཞལ་དཀའ་བའི་ཤེས་རིག་དང་མི་ཆོས་ཀུན་སྤྱོད་ཀྱི་གཏེར་མཛོད་ཆེན་པོ་ཞིག་རེད་ཨང་། དགེ་རྒན་ལགས། སྐུ་ཉིད་བདེ་བར་མཛོད་ཅིག   ད་ལྟ་ང་ཚོས་གངས་རིའི་མ་ཡུམ་གྱི་ཞལ་གདམས་སྙིང་ལ་བཅིངས་ནས། སློབ་དཔོན་ཁྱོད་ཀྱིས་གནང་པའི་བསླབ་བྱ་དག་བྲང་ལ་གཉེར་ནས་བོད་ཀྱི་རིག་པའི་སློབ་གླིང་སོ་སོར་ན་ཁྱེད་ཀྱི་གསུང་གི་བདུད་རྩིའི་ཐིགས་པ་རེ་རེ་ཉམས་པ་མེད་པར་གངས་ཅན་བུ་སློབ་སྟོང་ཕྲག་གི་བློ་ཡི་བཀྲ་ཤིས་བུམ་བཟང་དུ་གནང་གིན་ཡོད། ཁྱོད་ཀྱི་མི་རིགས་ཀྱི་རིག་གནས་སློབ་གསོར་འཛིན་པའི་ལྷག་བསམ་གྱི་སྒྲ་དབྱངས་སྙན་མོ་ལྷང་ལྷང་དུ་གྲགས་གིན་ཡོད།

    མདོར་ན།   ཕ་མ་དགེ་རྒན་དགའ་ན་དགེ་བ་ཞེས།།

             མཆོག་གསུམ་བསླུ་བ་མེད་པའི་བདེན་པ་འདི།།                           

             བདག་གཞན་ཐུན་མོང་འགྲུབ་པའི་དགེ་རྩ་ཡིན།།

             འདི་ལ་སྤྱད་ཀྱང་ལེགས་ཚོགས་ལྷུན་གྱིས་འགྲུབ།།

              ཞེས་སྤྱི་ལོ་༢༠༡༦ལོའི་ཟླ་༩པའི་ཚེས་༩ཉིན་ལ།