ཡིག་གཟུགས་དུས་ཆེན་ལ་ཕུལ་བའི་བརྩམས་ཆོས་འགྲེམ་སྟོན།

འགྲེམ་སྐོར་གཉིས་པ།

རྩོམ་པ་པོ་ཁྲལ་གསར་པ་སངས་པོ་སྤྲོད།

         གུས་པ་ནི་སྤྱི་ལོ་1996ལོར་གཙང་ལ་སྟོད་བྱང་གི་ངམ་རིང་དུ་སྐྱེས་ཤིང་། ཆུང་དུས་ནས་བཟུང་ཏེ་སློབ་གྲྭ་ཆུང་འབྲིང་ཆེ་གསུམ་འགྲིམས་ཤིང་། དགེ་བའི་བཤེས་གཉེན་བཟང་པོའི་བཀའ་སློབ་འོག་ཡི་གེ་འབྲི་ཀློག་ལ་སྦྱངས་པ་བྱས་ཤིང་། ལྷག་པར་དུ་བོད་ཡིག་ཡིག་གཟུགས་ལ་དང་ཞེན་ཆེ་བས་ལྷ་ས་ཧའེ་ཁྲེང་སློབ་ཆུང་གི་རྒན་མིག་དམར་བཀྲ་ཤིས་ལགས་དང་གངས་བརྩེ་སློབ་གསོའི་རྒན་ཆོས་གྲགས་ལགས་ཀྱི་ཞབས་དྲུང་ནས་གཞུང་བྲིས་ཚུགས་རིང་ཚུགས་ཐུང་། ཚུགས་ཆུང་དང་འཁྱུག་ཡིག་སོགས་དབུ་མེད་ཀྱི་ཡིག་གཟུགས་ཁག་གི་བྲིས་རྒྱུན་ཁུངས་ལྡན་སློབ་སྦྱོང་བྱས་ཤིང་། དྲ་ལམ་ནས་རྒན་རྟ་མགྲིན་མགོན་པོའི་ཕྱག་བྲིས་ཏེ། དྲུང་ཡིག་སྨོན་ལམ་རྒྱ་མཚོའི་དབུ་ཅན་ཡིག་གཟུགས་སློབ་སྦྱོང་བྱས་ནས་སྦྱངས་འབྲས་མི་དམན་པ་འཐོབ་ཅིང་། བརྩམ་བྱ་མང་དག་ཅིག་བྲིས་པ་ལའང་དགེ་རྒན་རྣམ་པའི་གདེང་འཇོག་བཟང་པོ་ཐོབ། གཞན་ཡང་2021ལོར་རྒན་ཚལ་པ་བསམ་གྲུབ་ལགས་ཀྱི་གདན་ཞུས་ལྟར་ལྷ་སའི་སློབ་ཆུང་བོད་ཡིག་དགེ་རྒན་གྱི་ཡིག་གཟུགས་ནུས་རྩལ་མཐོར་འདེགས་གཏོང་བའི་གཟབ་སྦྱོང་འཛིན་གྲྭའི་གདན་ཞུས་དགེ་རྒན་དང་། ལྷ་ས་མྱང་བྲན་སློབ་ཆུང་གི་བོད་ཡིག་ཚོགས་ཆུང་ལ་ཡིག་གཟུགས་སློབ་ཁྲིད་ཀྱང་བྱེད་མྱོང་། ད་ཆ་བོད་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་དང་། ལྷ་ས་གངས་བརྩེ་སློབ་གསོའི་ཡིག་གཟུགས་དགེ་རྒན་གྱི་བྱ་བར་འབུངས་བཞིན་མཆིས།