བོད་ལྗོངས་དིང་རི་རྫོང་གི་ས་ཡོམ་གནོད་སྐྱོན་ལ་ཕུལ་པའི་གདུང་སེམས།

   2025ལོའི་ཟླ་དང་པོའི་ཚེས7ཉིན་གྱི་སྔ་དྲོའི་ཆུ་ཚོད9དང་སྐར་མ5ཙམ་ལ། བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་མཚོ་སྒང་ཤང་གི་ཉེ་འཁོར་དུ(ཤར་གྱི་གཞུང་ཐིག་ཏུའུ87.45དང་བྱང་གི་འཕྲེད་ཐིག་ཏུའུ28.50ཡིན་པ)ས་ཡོམ་རིམ་པ6.8བརྒྱབ་པ་དང་། ཡོམ་ཁུངས་ཀྱི་གཏིང་ཚད་སྤྱི་ལེ10ཟིན་ཡོད་ཡོད་པས་སྣོད་བཅུད་ཀྱི་བཀོད་པར་ཆག་འཇིག་ཆེན་པོ་བཟོས།

   ས་ཡོམ་ནང་ཁྱོན་མི126རྐྱེན་ལམ་དུ་ཤོར་བ་དང་། ཁང་པ3609ལོག་པ། མི188ལ་ཚད་གཞི་མི་འདྲ་བའི་རྨས་སྐྱོན་ཕོག ཐེངས་འདིའི་ས་ཡོམ་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཐོང་ཆེན་ཚད་མཐོ་གནང་བ་དང་འབྲེལ་མཛུབ་སྟོན་གལ་ཆེན་གནང་བ་དང་། ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་བ། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་གིས་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་གྱི་སྣེ་ཁྲིད་དེ་ས་ཡུལ་དངོས་སུ་རོགས་སྐྱོབ་བཀོད་སྒྲིག་ལས་དོན་ལ་མཛུབ་ཁྲིད་གནང་བར་ཕེབས་པ་རེད།

   རང་བྱུང་གི་གནོད་པ་འདིར་བོད་ཀྱི་ཡིག་མཁན་རྣམས་ཀྱིས་རང་སོ་སོའི་ས་གནས་སུ་རྨས་སྐྱོན་ཚབ་ཆེན་འདི་ལ་གདུང་སེམས་མཉམ་སྐྱེད་ཀྱིས་བསྔོ་སྨོན་དང་སེམས་ཤུགས་མཚོན་པའི་ཡིག་གཟུགས་ཀྱི་བརྩམས་ཆོས་རེ་འགའ་ཕུལ་རྒྱུ་ལས་ཐབས་གཞན་མེད་ནའང་། སེམས་ཤུགས་འདུའི་པའི་བརྩམས་ཆོས་ཀྱི་ཁྲོད་དུ་ཁོ་རང་ཚོའི་བརྩེ་བ་དང་རེ་སྨོན་འདུས་ཡོད།

   སྐབས་འདིར་མདོ་སྨད་ཀྱི་ཡིག་མཁན་བློ་བཟང་འཇིགས་མེད་ལགས་ཀྱིས་གདུང་སེམས་མཉམ་སྐྱེད་མཚོན་པའི་ཡིག་གཟུགས་བརྩམས་ཆོས་ཁག་ཅིག་སྤེལ་བ་གཤམ་ལྟར།

རྩོམ་པ་པོ་ངོ་སྤྲོད་མདོར་བསྡུས།

       རྫོང་སྔོན་བློ་བཟང་འཇིགས་མེད།སྨྱུག་མིང་ལ་གངས་རྩེ་སྨྱུག་ཏུ་འབོད། རེབ་གོང་རྩེ་ཁོག་ཏུ་སྐྱེས། 《ལང་ཚོའི་ཟུངས་ཁྲག》ཅེས་པའི་སྙན་དེབ་པར་བསྐྲུན་བྱས།སྦྲང་ཆར་དང་གངས་རྒྱན་མེ་ཏོག་སོགས་བོད་ཁུལ་གྱི་དུས་དེབ་སྟེང་སྙན་ངག་གང་མང་བཀོད། རྒྱལ་ཡོངས་སྐབས་དང་བོའི་གངས་རྒྱན་མེ་ཏོག་རྟགས་མའི་རྩོམ་རིག་བྱ་དགའ་ཐོབ།རྒྱལ་ཡོངས་དང་ཞིང་ཆེན། ཁུལ་རིམ་པའི་ཡིག་གཟུགས་བྱ་དགའ་གང་མང་ཐོབ།《མཚོ་སྔོན་ཞིང་ཆེན་སྐབས་དྲུག་པའི་ཡིག་གཟུགས་བརྩམས་ཆོས་ཕྱོགས་བསྒྲིགས།》《མཚོ་སྔོན་རེབ་གོང་།》《རེབ་གོང་སྒྱུ་རྩལ་ཞིབ་འཇུག》《གསེར་མོ་ལྗོངས།》《རོང་བོ་དགུ་ཆུ།》《ཝང་གཉིས་རྒྱལ་ཡོངས་སྐབས་བཞི་བའི་ཡིག་རིས་བྱ་དགའ་ཐོབ་པའི་བརྩམས་ཆོས་འདེམ་བསྒྲིགས།》《ཀྲུང་གོ་བོད་ཀྱི་དྲ་བ།》《ཀྲུང་གོ་བོད་ཀྱི་ཡིག་གཟུགས་དྲ་བ།》《མཚོ་སྔོན་བོད་ཡིག་གསར་འགྱུར།》《མཚོ་སྔོན་བོད་ཡིག་ཁྲིམས་སྐྱོང་ཚགས་པར།》《གངས་རྒྱན་ན་ཆུང་ཚགས་པར།》《ཁམས་པའི་ཚགས་པར།》《རྔ་བའི་གསར་འགྱུར་ཚགས་པར།》《རྨ་ལྷོ་བོད་ཡིག་ཚགས་པར།》《མཚོ་སྔོན་པོ་དྲ་བ།》《མཚོ་ལྷོའི་བོད་ཡིག་ཡིག་གཟུགས་འཕྲིན་སྟེགས།》《ཨ་མདོ་བརྙན་འཕྲིན།》《ཁམས་པའི་བརྙན་འཕྲིན།》《རྨ་ལྷོ་བརྙན་འཕྲིན།》སོགས་ཀྱི་སྤྱི་སྟེགས་སུ་ཡིག་གཟུགས་བརྩམས་ཆོས་བདམས་བཀོད་བྱས།གཞན་ཡང་བརྩམས་ཆོས་ཁག་ཅིག་ལ་ཉར་ཚགས་འཛིན་ཡིག་ཐོབ། ད་ལྟ་མཚོ་སྔོན་ཞིང་ཆེན་བོད་ཡིག་ཡིག་གཟུགས་རྒྱུན་འཛིན་དར་སྤེལ་ཞིབ་འཇུག་ཚོགས་པའི་ཚོགས་མི་དང་།མཚོ་སྔོན་ཞིང་ཆེན་སྲ་སྨྱུག་ཡིག་མཁན་མཐུན་ཚོགས་ཀྱི་ཚོགས་མི། རྨ་ལྷོ་ཁུལ་ཡིག་མཁན་མཐུན་ཚོགས་ཀྱི་ཚོགས་མི།རྫོང་རིམ་པའི་ཡིག་གཟུགས་རྒྱུན་འཛིན་པ་བཅས་ཡིན།

སྤྱི་ཁྱབ་ལྟ་སྐུལ་བ།རྟ་མགྲིན་མགོན་པོ།

རྩོམ་སྒྲིག་པ།དཔལ་མགོན་ཚེ་རིང་།

ཞུ་དག་པ། བཀྲ་ཤིས་དོན་གྲུབ།

སྒྲིག་སྦྱོར་བ།མགོན་པོ་དོན་གྲུབ།