བསྟན་འཛིན་སྐ་བྲིས་གློག་རྡུལ་ཡིག་མཛོད་འགྲེམས་སྤེལ་དང་ཡིག་གཟུགས་བཤམས་སྟོན།

        ༢༠༢༤ ལོའི་སྤྱི་ཟླ་བཅུ་གཅིག་པའི་ཚེས་ཉེར་བཞི་ཉིན། བསྟན་འཛིན་སྐ་བྲིས་གློག་རྡུལ་ཡིག་གཟུགས་འགྲེམ་སྤེལ་དང་ཁྱིམ་རྒྱུད་མེས་པོའི་བརྩམས་ཆོས་བཤམ་སྟོན་མཛད་སྒོ་ཁྲེང་ཏུའུ་གྲོང་ཁྱེར་ནས་འཚོགས་ཤིང་། ཁམས་པའི་བརྙན་འཕྲིན་ཁང་གི་འཕྲིན་སྦྱོར་ཀུན་འདུས་ཀྱི་སྟེགས་བུ་དག་བརྒྱུད་ནས་ཐད་གཏོང་གནང་བ་རེད།

       ཐེངས་འདིའི་མཛད་སྒོའི་ཐོག་མཚོ་བོད་མཐོ་སྒང་ཞིབ་འཇུག་ཚོགས་པའི་ལས་འཛིན་གཞོན་པ་བློ་བཟང་ལྷུན་གྲུབ་རྡོ་རྗེ་དང་། སི་ཁྲོན་རིག་གནས་ཐིང་གི་ཐིང་ཀྲང་གཞོན་པ་ཟུར་པ་ཚེ་རིང་མགོན་པོ། མཚོ་སྔོན་ཞིང་ཆེན་གེ་སར་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ལྡོང་ནོར་སྡེ། མཚོ་སྔོན་དགེ་འོས་སློབ་གྲྭ་ཆེན་མོའི་སློབ་སྤྱི་གཞོན་པ་ཟུར་པ་རྒྱ་ཡེ་བཀྲ་བྷོ། ལོ་རྒྱུས་སྨྲ་བ་རྒྱལ་མོ་འབྲུག་པ་དང་། ཁ་སྒང་བཀྲ་ཤིས་ཚེ་རིང་སོགས་ཀྲུང་དབྱངས་དང་ཞིང་ཆེན། ཁུལ་རིམ་པའི་དབུ་ཁྲིད་དང་། ལྗོངས་ཞིང་ལྔའི་མཁས་པའི་དབང་པོ་དུ་མ་ཐེངས་འདིའི་མཛད་སྒོར་ཞུགས་ནས། བསྟན་འཛིན་སྐ་བྲིས་གློག་རྡུལ་ཡིག་གཟུགས་འགྲེམ་སྤེལ་དང་། གནའ་དེང་ཟུང་འབྲེལ། ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་མ་ཉམས་གོང་འཕེལ་དང་། རྒྱུན་འཛིན་དར་སྤེལ་བྱ་རྒྱུའི་ཐད་ནས་གསུངས་བཤད་དང་དགོངས་འཆར་ལྷུག་བརྗོད་གནང་བ་རེད།

     ཚོགས་ཐོག་ཏུ་བསྟན་འཛིན་སྐ་བྲིས་རིག་གནས་སྒྱུ་རྩལ་ལས་སྒྲུབ་ཁང་གི་སྤྱི་ཁྱབ་འགན་འཛིན་པ་སྤྲུལ་ཡེ་ཤེས་འཇིགས་མེད་དང་གར་དབང་གཉིས་ཀྱིས་བསྟན་འཛིན་སྐ་བྲིས་ཀྱི་ལོ་རྒྱུས་དང་། གློག་རྡུལ་ཡིག་གཟུགས་བཟོས་པའི་དགོས་པ། ཡིག་གཟུགས་ཀྱི་ཁྱད་ཆོས། གསར་བཏོད་བྱས་པའི་སྐུང་ཡིག་སོགས་ངོ་སྤྲོད་གནང་།

       བོད་ཀྱི་ཡིག་གཟུགས་ནི་བོད་ཀྱི་སྐད་དང་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པ་དང་། བོད་ཀྱི་སྲོལ་རྒྱུན་ཡིག་གཟུགས་ནི་ཡིག་གཟུགས་མཁས་ཅན་བརྒྱད་ལས་ཡིག་གཟུགས་ཀྱི་བྲིས་རྒྱུན་ཆེན་པོ་བརྒྱད་ཆགས་པ་རེད། ༢༠༠༨ལོར་བོད་ཀྱི་ཡིག་གཟུགས་དེ་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། ཁག་གཉིས་པའི་རྒྱལ་ཁབ་རིམ་པའི་གཟུགས་མེད་རིག་གནས་ཤུལ་བཞག་གི་མིང་གཞུང་ནང་བཅུག་ཡོད།

     བསྟན་འཛིན་སྐ་བྲིས་ཀྱི་ཁྱད་ཆོས་གཙོ་བོ་ནི་འདོན་ཀློག་བདེ་བ་དང་མཛེས་ཆ་ལྡན་པ། ཤེས་སླ་བ་སོགས་ཁྱད་ཆོས་མང་པོ་ལྡན། དུས་རབས་ཀྱི་འཕེལ་ཕྱོགས་དང་བསྟུན་ཏེ། མེས་པོ་གོང་མའི་ཤུལ་བཞག་གི་ཕ་ནོར་རྩ་ཆེན་དག་མི་ཉམས་རྒྱུན་འཛིན་བྱེད་ཆེད། ལོ་འདི་དག་གི་རིང་ལ་དཀའ་སྤྱད་འབད་འབུངས་མང་དུ་བྱས་ནས། ལོ་ཆེན་སྐ་བ་དཔལ་བརྩེགས་དང་། གཏེར་སྟོན་ཨོ་རྒྱན་བསྟན་འཛིན་དང་བླ་མ་གུ་དྲག་བསྟན་འཛིན་ཏེ་བསྟན་འཛིན་རྣམས་པ་གཉིས་ཀྱི་ཕྱག་བྲིས་འདི་ཉིད་ལ། བསྟན་འཛིན་སྐ་བྲིས་ཞེས་པའི་མཚན་གསོལ་ཏེ། དེང་རབས་གློག་རྡུལ་ལ་ཕབ་པའི་ཡིག་གཟུགས་བཞི་དང་། སྲོལ་རྒྱུན་གྱི་སྐུང་ཡིག་སྣ་མང་ཞིག་གསར་སྣོན་གྱི་ལག་རྩལ་སྤྱད་ནས་འཐུས་ཚང་བྱས་ནས། འཛམ་གླིང་ཡུལ་གྲུ་སོ་སོ་ན་བཞུགས་པའི་རྒྱ་ཆེའི་སྤྱོད་མཁན་རྣམ་པས་དྲྭ་ཐོག་ནས་རིན་མེད་སྒོས་ཕབ་ལེན་བྱེད་ཆོག་པ་གནང་འདུག

       བསྟན་འཛིན་སྐ་བྲིས་གློག་རྡུལ་ཡིག་གཟུགས་ཀྱི་མ་ཕྱི་སྟེ་གཏེར་ཆེན་ཨོ་རྒྱན་བསྟན་འཛིན་དང་། བླ་མ་གུ་དྲག་བསྟན་འཛིན་སོགས་ཁྱིམ་རྒྱུད་བླ་རབས་རྣམས་ཀྱི་གསུང་ཆོས་ཕྱོགས་བསྒྲིགས་དཔར་སྐྲུན་བྱས་པ་པོད་ལྔ་འགྲེམ་སྤེལ་དང་། མ་ཕྱིའི་དཔེ་རྙིང་སྣ་ཚོགས་པོད་བཅུ་ཕྲག་ལྔ་དྲུག་ཙམ་འགྲེམ་སྟོན་བྱས་ཡོད།

       ཚོགས་ཐོག་དུ་བོད་མདོ་དབུས་ཁམས་གསུམ་གྱི་ཚབ་མཚོན་ཡིག་མཁན་དང་། བོད་ཀྱི་དཔེ་རྙིང་བསྡུ་སྒྲིག་དང་དཔར་སྐྲུན་གྱི་ལས་ཀ་གཉེར་བའི་མཁས་དབང་དུ་མ་ཕེབས་ནས་བསྟན་འཛིན་སྐ་བྲིས་ལ་བསྔགས་བརྗོད་དང་། ཡིག་གཟུགས་གློག་རྡུལ་ལ་ཕབས་པའི་གལ་ཆེན་རང་བཞིན་སོགས་གླེང་།

      ཚོགས་ཐོག་ཏུ་བོད་ཀྱི་ལྷ་རིས་པ་གྲགས་ཅན་དང་། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མི་སྣ་རྒན་ལེགས་སྨོན་ལགས་ཀྱིས་བསྟན་འཛིན་སྐ་བྲིས་ཀྱི་སྤྱིའི་འགན་འཛིན་པར་ལེགས་སྐྱེས་གནང་བ།

      བསྟན་འཛིན་སྐ་བྲིས་གློག་རྡུལ་ཡིག་གཟུགས་དང་། ཁྱིམ་རྒྱུད་མེས་པོའི་བརྩམས་ཆོས་འགྲེམ་སྤེལ་མཛད་སྒོའི་གྲ་སྒྲིག་ཡུལ་དངོས།

སྤྱི་ཁྱབ་ལྟ་སྐུལ་བ།རྟ་མགྲིན་མགོན་པོ།

རྩོམ་སྒྲིག་པ།དཔལ་མགོན་ཚེ་རིང་།

ཞུ་དག་པ་བཀྲ་ཤིས་དོན།

སྒྲིག་སྦྱོར་བ།མགོན་པོ་དོན་གྲུབ།