ཀན་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་འཐུས་མིའི་ཚོགས་ཆེན་ཐེངས་ལྔ་བ་འཚོགས།

        ཟླ་11པའི་ཚེས27ཉིན། ཀན་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་འཐུས་མིའི་ཚོགས་ཆེན་ཐེངས་ལྔ་བ་འཚོགས་པ་དང་། ཁུལ་ཨུའི་ཧྲུའུ་ཅི་ཧོ་མོའུ་པའོ་དང་། ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཧྲུའུ་ཅིའམ་ཀྲུའུ་ཞི་ཝང་ཏིན་པའོ་གྲོས་ཚོགས་སུ་ཞུགས་ནས་གཏམ་བཤད། ཁུལ་གྱི་མགོ་ཁྲིད་རིན་ཆེན་དོན་གྲུབ་དང་ཝང་གོ་ཅོན། དབྱང་ཞའོ་རྨིན། ཏུན་ཝུན་ཧྭ། ལི་ཧྲི་ཀྲུང་བཅས་གྲོས་ཚོགས་སུ་ཞུགས། ཁུལ་ཨུའི་རྒྱུན་ཨུའམ་ཁུལ་ཨུའི་དྲིལ་སྒྲོག་པུའུ་ཡི་པུའུ་ཀྲང་དབྱང་ཏུང་ཕིང་གིས་གྲོས་ཚོགས་ཀྱི་མགོ་བཟུང་།

        ཧོ་མོའུ་པའོ་ཡིས་ཁུལ་ཨུ་དང་ཁུལ་དམངས་ཆེན་རྒྱུན་ཨུ་ཁང་། ཁུལ་སྲིད་གཞུང་། ཁུལ་སྲིད་གྲོས་ཀྱི་ཚབ་བྱས་ནས་ཚོགས་འདུ་འཚོགས་པར་རྟེན་འབྲེལ་ཞུས་པ་དང་། ཚོགས་ཞུགས་འཐུས་མི་དང་ཁུལ་ཡོངས་ཀྱི་རྒྱ་ཆེའི་རྩོམ་རིག་སྒྱུ་རྩལ་གྱི་བྱ་བྱེད་པར་ལྷག་བསམ་ཟོལ་མེད་ཀྱིས་འཚམས་འདྲི་ཞུས། ཁོས་རྒྱ་ཆེའི་རྩོམ་རིག་སྒྱུ་རྩལ་གྱི་བྱ་བྱེད་པ་མི་དམངས་ཀྱི་ཁྲོད་དུ་རྐང་ཚུགས་ཤིང་། མི་དམངས་ཀྱི་ལངས་ཕྱོགས་སུ་ལངས་པ་དང་མང་ཚོགས་ཀྱི་ལམ་དུ་བསྐྱོད་པ། མི་དམངས་ལ་བསྟོད་གླུ་བླངས་ཏེ། མི་དམངས་ཀྱི་འཚོ་བར་བསྟོད་པ་དང་མི་དམངས་ཀྱི་སྙིང་རུས་ལ་སྐུལ་བ། མི་དམངས་ཀྱི་དགའ་བསུ་ཐོབ་པའི་བརྩམས་ཆོས་ཕུལ་དུ་བྱུང་བ་གསར་རྩོམ་བྱ་དགོས་པ་དང་། རྒྱ་ཆེའི་རྩོམ་རིག་སྒྱུ་རྩལ་བྱ་བྱེད་པས་རང་འགུལ་གྱིས་བདེ་འཇགས་དང་བརྟན་བརླིང་བསྐྲུན་པ་དང་མི་རིགས་མཐུན་སྒྲིལ་ཡར་ཐོན་དང་སྐྱེ་ཁམས་དཔལ་ཡོན་འཛུགས་སྐྲུན། འཛིན་གསུམ་སྐུལ་གསུམ་གྱི་འགུལ་སྐྱོད། མང་ཚོགས་ཀྱི་བྱ་བ་ཡོངས་སུ་ཁེབས་པ་ལྔའི་འགུལ་སྐྱོད་སོགས་བྱ་བ་གཙོ་བོ་དག་སྒྱུ་རྩལ་གྱི་ལམ་ནས་འབྲི་བཞེངས་དང་ཟིན་ཐོར་བཀོད་དེ་ཕྱིར་མངོན་པར་བྱ་དགོས། རྒྱ་ཆེའི་རྩོམ་རིག་སྒྱུ་རྩལ་བྱ་བྱེད་པས་བདེན་སྲུང་གསར་གཏོད་དང་རྨང་གཞི་བརྟན་པོར་བཏང་སྟེ། ཧུར་བརྩོན་གྱིས་ཀན་ལྷོ་ནི་རིག་རྩལ་འཕེལ་བའི་གནས་མཆོག་དང་རིག་གནས་དར་བའི་མཐོ་སྒང་དུ་བསྐྲུན་དགོས་པའི་རེ་བ་བཏོན།

      ཝང་ཏིན་པའོ་ཡིས་བདེན་སྲུང་གསར་གཏོད་ཀྱི་རྒྱུན་བསྐྱངས་ནས་ཧུར་བརྩོན་གྱིས་དུས་རབས་གསར་བའི་རྩོམ་རིག་སྒྱུ་རྩལ་གྱི་ལས་དོན་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་བར་བསྐུལ་བ་དང་། སྤྱོད་ཡོན་གཉིས་ལྡན་གྱི་རྒྱུན་བསྐྱངས་ནས་དུས་རབས་གསར་བའི་རྩོམ་རིག་སྒྱུ་རྩལ་གྱི་མཐོ་སར་བསྙེགས་ནས་མི་ཚེའི་རིན་ཐང་མངོན་འགྱུར་བྱས་ཏེ། དེང་རབས་ཅན་གྱི་ཀན་སུའུ་འཛུགས་སྐྲུན་ལ་རིན་ཐང་གི་སྣེ་ཁྲིད་ནུས་པ་དང་རིག་གནས་ཀྱི་ཆིག་སྒྲིལ་ནུས་པ། སྙིང་སྟོབས་ཀྱི་སྐུལ་འདེད་ནུས་པ་འདོན་དགོས་ཞེས་ནན་གྱིས་བསྟན། གྲོས་ཚོགས་སུ་ཁུལ་བུད་མེད་མཉམ་འབྲེལ་ལྷན་ཚོགས་ཀྱི་འགན་ཁུར་བས་མི་དམངས་ཚོགས་པའི་ཚབ་བྱས་ནས་ཤིས་ཚིག་ཕུལ་བ་དང་། གྲོས་ཚོགས་སུ༼   ཀན་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཨུ་ཡོན་ལྷན་ཁང་སྐབས་བཞི་པའི་བྱ་བའི་སྙན་ཞུའི་གྲོས་ཞིབ་མ་ཟིན   ༽   དང༼   ཀན་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་སྒྲིག་ཡིག་བཟོ་བཅོས་སྐོར་གྱི་འཆར་ཟིན ༽   གྱི་གསལ་བཤད་ལ་ཉན། །

ལོ་ཙཱ་བ། སྐལ་བཟང་ཚེ་རིང་།

རྩོམ་སྒྲིག་པ། དྭངས་གསལ་ལྷ་མོ།

རྩོམ་སྒྲིག་འགན་འཁུར་པ། སངས་རྒྱས་སྐྱབས།

ཞུ་དག་པ། རྡོ་རྗེ་ཚེ་རིང་།

ལྟ་སྐུལ་བ། ལི་པའེ་ཡུན། གཡུང་དྲུང་སྐྱབས།