ཡིག་གཟུགས་ཀ་དཔེ་ངོ་སྤྲོད།

《པཎ་ཆེན་ཚུགས་རིང་གི་ཀ་དཔེ་དཔྱོད་ལྡན་སྙིང་ནོར》དངོས་སུ་པར་སྐྲུན་འགྲེམ་སྤེལ་བྱས།

ཉེ་ཆར། མཚོ་སྔོན་མི་རིགས་དཔེ་སྐྲུན་ཁང་གིས《པཎ་ཆེན་ཚུགས་རིང་གི་ཀ་དཔེ་དཔྱོད་ལྡན་སྙིང་ནོར》ཞེས་པ་དངོས་སུ་པར་སྐྲུན་འགྲེམ་སྤེལ་བྱས།

པཎ་ཆེན་ཚུགས་རིང་ནི་གཙང་བྲིས་ཚུགས་ཆེན་ལ་འགྱུར་བ་ཅུང་ཟད་བཏང་ནས་གསར་དུ་བཏོད་པའི་བྲིས་ལུགས་གསར་བ་ཞིག་ཡིན་ལ། ཡིག་གཟུགས་འདིར་ཚུགས་ཆེན་གྱི་ཚད་གཞི་དང་གཏན་འབེབས་སམ་ཆ་ཚད་མཐའ་དག་ཡོངས་སུ་ཚང་བར་མ་ཟད།  དེ་ལ་ཐུན་མིན་གྱི་ཁྱད་ཆོས་བརྗིད་ལ་ནོན་ཆེ་བ་དང་།སྒམ་བརླིང་རང་ཚུགས་ཐུབ་པ།རྒྱན་དུ་ཤོམ་ལ་དབང་དྲག་གི་ཟིལ་ཤུགས་ཅུང་ཟད་དང་བཅས་པའི་ཉམས་དང་ལྡན་པ་ལ་སོགས་ཡོད་ཅིང་།དེ་དང་ཆབས་ཅིག་བྱིན་ཆགས་པ་མཛེས་དཔྱོད་ཀྱི་རིན་ཐང་གིས་ཕྱུག་པ།ལག་ལེན་དུ་འཁྱེར་བདེ་བས་གོ་ཆོད་པ།སྒྲོས་གཙང་ཞིང་གསལ་བས་ངོས་ཟིན་སླ་བ་སོགས་ཀྱང་རང་ཆས་སུ་ཡོད་པས།ཡིག་གཟུགས་ཀྱི་རིག་པའི་གནས་ལ་དགའ་མོས་དང་སློབ་གཉེར་ཡོད་མཁན་དག་ལྟ་ཅི་སྨོས།བོད་ཡིག་གི་ཀློག་པ་པོ་སྤྱིར་བཏང་བ་དང་ཡིག་རིགས་གཞན་པའི་ཡི་གེ་པའམ་ཡང་ན་སྒྱུ་རྩལ་མཁས་ཅན་སོགས་ཀྱིས་ཀྱང་འདི་ལ་མཐོང་བཟོ་དང་རྩིས་ཆེན་གནང་གིན་ཡོད་པ་ཀུན་གྱིས་མཁྱེན་གསལ་ལྟར་རོ།། 

དེབ་འདིའི་སྒྲིག་པ་པོས་སྤྱི་ཚོགས་ཐོག་ཉིན་རེ་ལས་ཉིན་རེར་པཎ་ཆེན་ཚུགས་རིང་ལ་སྦྱོང་བ་བྱེད་མཁན་ཇེ་མང་དུ་འགྲོ་བཞིན་པ་དག་གི་དགོས་མཁོ་སྐོང་བ་དང་།པཎ་ཆེན་ཚུགས་རིང་ལ་མིག་སྔར་ཀ་དཔེ་མཐོང་དུ་མེད་པའི་སྟོང་ཆ་གསབ་པའི་ཆེད་དུ།༧ཀུན་གཟིགས་བཅུ་པ་ཆེན་མོ་མཆོག་གི་ཡིག་གཟུགས་བརྩམས་ཆོས་སམ་ཕྱག་བྲིས་སྣ་ཚོགས་ཡུན་རིང་འཚོལ་སྡུད་ཉར་ཚགས་བྱས་པ་བརྒྱུད།ཁོང་གི་ཚུགས་ཆེན་ཡིག་གཟུགས་ལས་མཚོན་བྱེད་རང་བཞིན་གྱི་ཡི་གེ་འབྲི་སྟངས་ལེགས་པར་བདམས་ཤིང་།དེང་རབས་གློག་ཀླད་ཀྱི་ཇུས་འགོད་ལག་རྩལ་སྤྱད་ནས་ཀ་དཔེ་རུ་བཟོས་པར་མ་ཟད།ས་བཅད་སྒྲིག་སྟངས་ཐད་ནས་ཀྱང་བོད་ཡིག་གི་ཡིག་གཟུགས་བསླབ་ཚན་གྱི་དཔེ་གཞིའི་བླང་བྱ་ལྟར།དབུ་ཁྱུད་འབྲི་ཚུལ་ནས་མགོ་བརྩམས་ཤིང་།དེ་ནས་རིམ་བཞིན་དབྱངས་གསལ་སོ་བཞི་དང་།མགོ་འདོགས་བརྩེགས་གསུམ།ཐ་སྙད་དང་ཚིགས་བཅད་འབྲི་ཚུལ་སོགས་ཀྱི་ནང་དོན་ཚང་ལ་མ་ནོར་བ་ཞིག་ཏུ་བསྒྲིགས་ཡོད།

གཞན་དེང་དུས་ཀྱི་ལས་དང་པོ་བ་དག་གིས་ཡིག་གཟུགས་སྒྱུ་རྩལ་གྱི་ལུང་ཁུངས་རྒྱབ་རྟེན་ཅི་ཡིན་ངེས་པའི་ཆེད་དུ《ཡི་གེའི་བསྟན་བཅོས་སྟོང་ཐུན་སྨྱུག་གུའི་བསྟན་བཅོས་འཕྲུལ་གྱི་སྒྲོན་མེ》ཞེས་བྱ་བ་གཞུང་རྩ་བར་བྱས་ཏེ་ཀ་དཔེ་འདིའི་དབུ་རུ་དྲངས་ཡོད་ཅིང་།དེ་ཡང་རྩོམ་སྒྲིག་ཁོངས་མི་རྣམས་ཀྱིས་གཞུང་འདིའི་མ་དཔེ་ལག་བྲིས་མ་ལ་གཏུགས་ནས་ཞུ་དག་རྣལ་མ་ཞིག་སོང་ཁུལ་ཡིན་པ་བཅས། མདོར་ན། པཎ་ཆེན་ཚུགས་རིང་གི་ཀ་དཔེ་འདི་གཞུང་ལུགས་དང་ལག་ལེན་ཟུང་འབྲེལ་གྱི་ཚུལ་དུ་བསྒྲིགས་ཡོད་པས་ན། ཡིག་གཟུགས་ལ་དགའ་མོས་དང་སློབ་སྦྱོང་བྱེད་མཁན་དཔྱོད་ལྡན་དག་གི་སྙིང་ནོར་ལྟ་བུ་ཡིན་ནོ།།

སྤྱི་ཁྱབ་ལྟ་སྐུལ་བ། རྟ་མགྲིན་མགོན་པོ།

རྩོམ་སྒྲིག་པ། དཔལ་མགོན་ཚེ་རིང་།

ཞུ་དག་པ། བཀྲ་ཤིས་དོན་གྲུབ།

འདོན་སྤྲོད་མཁན། འབའ་ཚེར་རྟ་མགྲིན་རྡོ་རྗེ།