འབྲི་གཞི་ཤོག་བུ་དང་མཚལ་སྣག་སྨྱུ་གུ་དང་སྨྱུག་གྲི་སོགས་བསྟན་པ།

2024-02-27

གསུང་རབ་རིན་པོ་ཆེ་ཤེས་བྱ་ཀུན་ཁྱབ་ཀྱི་ཐུན་མོང་རིག་གནས་ལས་བྱུང་བའི་བཟོ་རིག་པར་བཀོད་པའི་བོད་ཀྱི་ཡིག་གཟུགས་ཀྱི་ཤེས་བྱ་ལས།


བྱང་ནས་བྲི་བའི་སྐབས་སུ་འབྲི་གཞི་ཤོག་བུ།འབྲི་བྱེད་མཚལ་སྣག་སྨྱུ་གུའི་བྱ་བ་རྣམས་སྔོན་གྱི་བསྟན་བཅོས་རྣམས་དང་ལག་རྒྱུན་ཁུངས་དག་ལས་འབྱུང་བ་བཞིན་མཁས་པར་བསླབས་ནས་གཟབ་སྟེ་ལག་ཏུ་བླངས་ངས་སྔོན་གྱི་མཁས་པའི་ལག་རྗེས་ལ་འགྲན་བཟོད་པར་འགྱུར་རོ།།དེ་དག་ཀྱང་སྔོན་རབས་ཀྱི་བསྟན་བཅོས་ལས་ཚིག་ཚོགས་རྒྱས་བསྡུས་དང་།ལག་ལེན་གྱི་བྱེ་བྲག་མཐའ་ཡས་པ་འབྱུང་བ་ལས། ད་ལྟ་ལག་ལེན་དུ་བྱེད་པ་རྣམས་བསྡུས་ཏེ་བཀོལ་ནས་ཕྱོགས་ཙམ་བཤད་ན།ཡི་གེ་འབྲི་བའི་གཞི་དང་ནི།། འབྲི་བའི་ལག་ཆ་འབྲི་རྫས་གསུམ།། དང་པོ་ལ་ཡང་རབ་འབྲིང་ཐ།།རབ་ནི་ཤོག་ལྡུམ་དུང་ལོ་མ།། འབྲི་བའི་ལག་ཆ་འབྲི་རྫས་གསུམ།། དང་པོ་ལ་ཡང་རབ་འབྲིང་ཐ།།རབ་ནི་ཤོག་ལྡུམ་དུང་ལོ་མ།། ས་ནག་ཤུག་པ་ཡོད་པ་དང་།། རྫ་བྲག་མེད་སར་སྐྱེས་པ་ལེགས།། བྱེ་མ་ས་དམར་གཡམ་པའི་ནང་།།སྐྱེས་པ་མདོག་སེར་ཚོས་དཀའ་སྲ།། ཤུན་མཐུག་འབུ་ཡོད་དམན་པའོ།། ལེགས་པར་བཏུས་ནས་ས་རྡུལ་བཀྲུ།།ཕྱི་ཤུན་བྲད་བརྡར་སྙིང་པོ་བླང་།། བྱ་རྡོ་བསྲེགས་པ་ཆུ་འཁྱག་ཏུ།། འཕངས་ཏེ་དཀྲུགས་ལ་གར་སླ་ནི།།དར་བ་ཙམ་བྱས་ལྕེ་ཐོག་ཏུ།། རྒྱ་ཚྭ་ལྟར་འབིགས་ལེགས་པའི་རྟགས།། ལམ་དུམ་སོང་ངར་མི་འབྱུང་།།དེ་ཉིད་གྲུང་གཞུག་སྙིགས་མེད་ཀྱི།། ཁུ་བའི་ནང་དུ་ཤོག་ལྡུམ་བཙོ།། ཐལ་ཁུས་བཙོས་ཀྱང་མཚོན་ཙམ་འོང་།།ཚོས་ནས་རྡོ་གཏུན་མཁྲེགས་པར་བརྡུངས།། ཟན་ལྟར་གྱུར་ནས་ཁ་རེའི་ཚད།། ཆ་བསྒོས་སྣོད་དུ་དེ་མཉམ་གྱི།།ཆུ་དང་ལྷན་ཅིག་དཀྲུགས་པ་དེ།། མ་རྙོག་དྭངས་པའི་ཆུ་འཁྱིལ་ནང་།།ཤོག་བྲེ་མ་ཡོ་བཞག་ལ་བླུག། རྒྱུ་འདིས་སྲབ་མཐུག་གང་ཡང་ལེགས།། འབྲིང་ནི་ཨ་ག་རུའི་ཤུན་པ།།སྔོ་བཤུས་བྱས་པའི་བར་ཤུན་དེ།། ཡུད་ཙམ་བཙོས་ལ་ཁུ་ཐོག་ཕོ།། བཙོ་བརྡུང་དཀྲུགས་བླུག་གོང་དང་འདྲ།།གླེགས་བམ་ཤོག་མཐུག་ཁྱད་པར་བཟང་།། ཐ་མ་རེའུ་ལྕག་རྩ་བ་བརྐོ།། ཕྱི་སྐོགས་ནང་སྙིང་བསལ་བ་ཡི།།བར་ཤུན་རྡོ་ཁུས་བཙོ་བར་བྱ།། ཐལ་ཁུས་བཙོས་ན་བལ་ལྟར་ལྷོད།། དུག་འདོན་ཨ་རུ་ཐུན་གཅིག་འདེབས།།འདི་ཡང་བྱེ་མ་ས་འབོལ་དང་།།   ས་ནག་སྙི་སར་སྐྱེས་པ་བཟང་།།ཡིག་བསྐུར་འབྲི་བའི་སྲབ་ཤོག་ལས།། གླེགས་བམ་ཧ་ཅང་ལེགས་མི་འགྱུར།། ཡུལ་ཕྱོགས་ཐ་དད་ནས་འབྱུང་བའི།།ཤོག་བུ་བཟང་ངན་སྣ་ཚོགས་པ།།   རྒྱུ་དང་བཟོ་ཐབས་བྱེད་པས་ཏེ།།མང་དུ་སྤྲོས་ཀྱང་དགོས་པ་དབེན།། དེ་ནས་ནག་དྲི་འཛར་འཛེར་སོགས།། སྤུ་གཅོད་རྡོ་ནི་དཀར་སོབ་ཀྱིས།།དྲུག་བདར་བུག་བརྡོལ་མེད་པ་བྱ།། ཤོག་རྒྱུ་གཙང་ན་བརྡུང་ཟིན་རྗེས།། དྲུད་པས་ས་རྡོའི་ར་རི་འདོན།།མདོག་དཀར་ཁམས་འཛིན་ལེགས་པར་བཤད།། གང་ལྟར་སད་རུལ་མེད་པའི་གྲོ།། ཆུ་ཚན་གྱིས་བཀྲུས་ཞིབ་པར་བཏགས།།ཆུ་ནང་འོ་མ་ལྟ་བུར་དཀྲུགས།། ཝུ་བ་གང་བྱུང་བཅད་ལ་དོར།། ཅུང་ཟད་གྲུངས་བཅུག་ཡུན་རིང་དུ།།བཞག་ན་སླ་བའི་ཉེན་ཡོད་དོ།། གྲོ་ཕྱེ་ཞག་གྲངས་ཉི་ཤུ་ཡན།། རྙིང་པ་དམ་རྩི་ལྷོད་པས་སྤང་།།དྭངས་མ་ཆ་གཉིས་བགོས་པ་ཡི།། ཆ་གཅིག་ཚོས་པར་བཀོལ་ལ་ཕོག། ཆ་གཅིག་བསྲེས་ལ་རླུང་མེད་ཅིང་།།ཉི་མ་ཚ་དང་རླན་ཡོད་ཀྱི།། ས་རུ་ཤོག་གུ་དྲངས་ནས་བསྐམ།། ཡང་ན་སླ་ཆོས་བག་ཆུ་ལ།། དར་བ་མར་ཚག་བཞི་ཆ་བསྲེ།།ཅུང་ཟད་དྲངས་ནས་འདྲེན་པར་བྱ།། ཧ་ཅང་ཚ་ན་ཤོག་གུ་ཆད།། གྲང་ན་དམ་ལྷོད་སྐྱོ་མས་གོས།། སྐམ་ཐག་ཆོད་ནས་ས་རྡུལ་བསལ།།སྔོ་དང་བྱེ་མས་སྦང་བཤད་ཀྱང་།། སྐྱོན་རེ་ཡོད་པས་སྐམ་པོ་ཁ།། བཅུ་རེའི་བར་དུ་ཆུར་བཅུག་པའི།།རློན་པ་རེ་རེ་བཞག་ནས་མནན།། རིང་ན་ཞག་གཅིག་ཐུང་ན་ཡང་།། ཇ་སྦྱོར་ཡུན་ཙམ་བཞག་ནས་སུ།། ཡང་བསྡམས་ཡང་བསྲེ་སྐམ་རློན་སྙོམས།།མཆིན་པ་ལྟ་བུའི་རྡོ་འཇམ་སྟེང་།། གཡག་རྭ་སྣུམ་དྲེག་མེད་པས་བརྡུང་།། མ་འཛོམ་ཤིང་གི་སྟན་གཏུན་ནི།།འཇམ་པོས་བརྡུངས་ཀྱང་སྐྱོན་མི་འབྱུང་།། བག་ཆུ་ཆེས་ན་བག་ཆུ་བྱུགས།། ཆུང་ན་མུར་སྤྱིན་བཏང་བར་བཤད།།སྐམ་པོ་ཅུང་ཟད་དབུར་དཀའ་ལ།། ནེམ་ཡོད་ཙམ་དེ་སླ་ཞིང་ལེགས།། དབུར་གདན་མི་འགུལ་བརྟན་པ་དགོས།།དུང་སྔོ་མཆོང་ལ་རི་མོ་མང་།། ཁྱད་འཕགས་གསེར་ཕྲའམ་གཟི་ཡིན་ལ།། མ་རྙེད་གཡག་རྒོད་རྭ་ཅོ་ནི།།གནག་ཅིང་སྣུམ་པ་དེས་ཀྱང་རུང་།། ཐིག་ཤིང་དྲང་ཞིང་སྙོམས་པ་ལ།། དྲི་བཟང་ཡུང་བ་སྐྱེར་ཤུན་གྱི།།ཁུ་བས་བྱང་ཆུབ་རྒྱུན་ལམ་དང་།། ཕྱི་ནང་ཐིག་སྐོར་མཚལ་གྱིས་གདབ།། རྒྱས་བསྡུས་གླེགས་བམ་ཆེ་ཆུང་བསྟུན།།ཟུབ་དང་མི་སྙོམས་འཁྱོགས་པོ་སྐྱོན།། འབྲི་བའི་ལག་ཆ་རྒྱ་སྨྱུག་ནི།། སྡོང་པོ་ཆེར་སྐྱེས་ཤ་མཐུག་ལྕི།།མདོག་སེར་མ་འཆུས་སྦུ་གུ་མེད།། རྩི་འཇམ་སོས་མནན་འདྲེད་པ་ནི།། སྣག་གསེར་ཡིག་རིགས་ཀུན་ལ་བསྔགས།།འཇང་སྨྱུག་མདོག་ནག་སྦུ་གུ་ཅན།། སིབ་ཆེས་དཀྱུས་ཡིག་འབྲི་ལ་བདེ།། ལྕགས་སྨྱུག་གསུང་རབ་གཏོས་ཆེར་བཟང་།།ལྷོ་སྨྱུག་རོང་སྨྱུག་ལེགས་པའང་རུང་།། སྨྱུག་རྣམས་ཡུན་རིང་དུད་ཁང་དུ།། བཏགས་ལ་བ་རྐང་རྙིང་པ་རབ།།མ་རྙེད་རྐང་མར་རྙིང་པས་བྱུགས།། ཡོས་ཚན་ནང་བཅུག་འཇམ་གྱིས་ཕྱི།། རུས་པ་ལྟ་བུར་མཁྲེགས་པར་འགྱུར།།བཟོ་གནས་ལེགས་ཉེས་གྲི་ལ་རག།   ལྕགས་རིགས་བཟང་ཞིང་ཞུན་ཐར་ཐོན།།རྣོ་མཉེན་ངར་གསུམ་འཛོམ་པའི་གྲི།། རྩེ་དང་སོ་རྣོ་གྲང་བག་ཞོལ།། ལྟག་པ་དྲང་ཞིང་སྲབ་པ་ནི།།བདར་རྡོ་སྲབ་མཉེན་རན་པ་ལ།། ཕྱི་ལ་ཁལ་གཅིག་ནང་དུ་དྲུག།བདར་བས་རྣོ་ཚད་སྤུ་གཤོག་ནུས།། ཧ་ཅང་བདར་ན་རྡུལ་དུ་འགྲོ།། ཅུང་ཟད་བཙུགས་བདར་མཐུག་རྣོ་འབྱུང་།།སྨྱུ་གུ་མཐོ་བས་མི་རིང་ཞིང་།། མཛུབ་བས་མི་ཐུང་ཕྲ་སྦོམ་རན།། མཐེབ་མཛུབ་ཚད་སྦྱར་འགྲིམས་བདེར་གཞོག། རྩེ་སོར་ཕྱེད་གཉིས་གཞལ་བའི་སར།། སུམ་གཉིས་རྫིང་ལ་སུམ་གཅིག་མཆུ།།གཟོབ་འདོད་གས་ཆུང་མགྱོགས་འདོད་ཆེ།། རྫིང་འདྲ་ཡུར་བ་འདྲ་བ་ཞེས།། རྒྱབ་ནས་བལྟས་ཏེ་གཡས་གཡོན་སྙོམས།།རྫིང་མཆུ་ཧ་ཅང་མི་སྲབ་ལ།། བཅད་ཁ་གྱེན་གསེག་རིམ་གཅོད་བྱ།། གསུམ་ལྡན་ལྔ་འཛོམ་ཞེས་པའི་དོན།།སྨྱུ་གུ་མཆུ་ལ་མཁས་གྱུར་ན།། ཡི་གེའི་འབྲུ་ལ་མཁས་པར་བཤད།། ཡིག་གཟུགས་བཟང་ངན་ལག་པའི་རྒྱུ།།མགྱོགས་དལ་སྦྱངས་པ་ཆེ་ཆུང་སྟེ།། དག་ཆ་རྣམ་རྟོག་རྒོད་གཡུང་གཙོ།། མཐེབ་མཛུབ་ཤེད་སྙོམས་འཕུར་འཛུམ་རན།།ཆིག་འཐེན་ཤེས་དང་དྲང་མྱུར་ལྡན།། སྒྲོས་དག་སྐྱེན་གསུམ་འཛོམ་པ་མཆོག།འབྲི་བའི་རྫས་ནི་སྣག་མཚལ་གཉིས།། དང་པོ་སྣག་ཚའི་རྒྱུ་རབ་ནི།། མར་ནག་མེ་ཏོག་བསགས་པའམ།།སྒྲོན་ཤིང་འབྲིང་ནི་ཉ་སྦྲིད་པའི།།   ཤུན་པ་དེ་གཉིས་སྔོ་བཤུས་བྱ།། གྲོ་གའང་དེ་དང་ཕྱོགས་མཚུངས་ལ།།ཐ་མ་ཐང་ཚིལ་རྒན་ཆེས་ཁྲག། གཞོན་ཆེས་འབྱར་བག་ཅན་མིན་པ།། ཚིལ་བུ་འདྲ་དེ་མང་དུ་བསགས།། བརྩིགས་ཐབས་འཁོར་མོའམ་བྲུ་ཐབ་སྟེང་།།རྫ་ཁོག་ཞབས་རྡོལ་ལྔ་བདུན་བརྩེགས།། ཐབ་ནང་ཤིང་ལ་མེ་སྦར་བའི།། འོག་མའི་དྲེག་པ་དམན་པས་སྤང་།།གོང་མ་རྣམས་ཀྱི་དུད་པ་བསྡུ།། ཆགས་དཀའ་འགྲིམ་རྡུར་འབྱུང་བས་ན།། དབེན་པའི་གནས་སུ་གཟབ་སྟེ་བྱ།།ལྕགས་སྣོད་སྤྱིན་ཆུའི་དྭངས་མ་ལ།། བཏབ་སྟེ་མེ་སྟེང་ཅུང་ཟད་དཀྲུགས།། སྤྱིན་བཞུར་ཁུ་བ་བླུག་ལ་མཉེ།།བྲེ་རེ་ཉིན་རེར་འདུར་བ་དང་།། ཚེག་སྒྲ་གྲགས་ན་ཚད་དུ་བཤད།། འོན་ཀྱང་ཤེད་མཉམ་རན་པས་འདུར།།ཇི་ཙམ་སོང་བ་དེ་ཙམ་ལེགས།། སྐམ་ཐག་ཡང་ཡང་གཅོད་པ་ནི།། མཚལ་སྣག་མན་ངག་མཆོག་ཏུ་བཟུང་།།གར་སླ་ཟན་ཙམ་གྱུར་པའི་དུས།། ལག་པར་འབྱར་ན་དམ་ཆུང་ལ།། སྲ་ཞིང་འཐས་ན་ཆེ་བའི་སྐྱོན།། ཤ་རྗེས་དོད་ཅིང་མི་འབྱར་བ།།དམ་ལྷོད་རན་པའོ་ཚད་དུ་བཟུང་།། གཞན་ཡང་སྔོན་རབས་བསྟན་བཅོས་ལས།། མ་ནུ་རུ་རྟས་འཇམ་ཞིང་སྨེ།།ཙནྡན་ཁུ་བས་སྨྱུ་གུས་འཛིན།། རྒྱ་སྐྱེགས་དམར་མདངས་འོད་དུ་འཚེར།། གླ་རྩིས་རྒྱུན་དུ་དྲི་བཟང་འཐུལ།།དབང་ལག་སུག་པའི་ཁུ་བས་ནི།། འོད་འབར་དམ་འབྱོར་བླ་ན་མེད།། སྤྱི་བཞུར་ཁུ་བས་ཤིན་ཏུ་རྒྱུག། ག་བུར་ཆུ་ཡིས་དབྱར་མི་རུལ།། སྒ་སྐྱ་པི་ལིང་ཁུ་བས་ནི།།དགུན་གྱི་དུས་སུ་འཁྱག་མི་འགྱུར།། ཞེས་སོགས་བཤད་ཅིང་ཐང་ཁྲག་དང་།། གྲོ་ནས་ཡོས་ཚིག་ཁུ་བ་སོགས།།སྲེ་བའི་ལག་ལེན་མང་ན་ཡང་།། སུག་པ་སྤྱི་བཞུར་སོགས་འགའ་ལས།། ཕལ་ཆེར་སྐྱོན་དང་བཅས་པ་ཉིད།།སྦྱོར་སྡེ་མང་བས་ལེགས་པ་མིན།། རྒྱུ་བཟང་གནད་ཤེས་ལས་ནུས་དགོས།། ཕོན་ཉུང་བཟོ་ན་མི་གཞོན་གྱི།།ལག་པར་འཕར་མཉེད་བྱས་པ་མཆོག། མཚལ་རབ་བཅག་མཚམས་ཤེལ་དཀར་འདྲ།། འབྲིང་པོ་དམར་དྭངས་ཐ་མ་སྨུག།དཀར་འཇམ་གཏུན་ནང་ཕྲམ་ཕྲུམ་བརྡུང་།། ཨ་རུའི་དྭངས་ཆུ་མཚལ་ནུབ་བླུག། ལན་གསུམ་བར་དུ་ཁ་ཆུ་ཕོ།།གཏུན་སྐོར་ཅུང་ཟད་བྱ་བར་གཅེས།། དེ་ནས་ཡུན་རིང་བར་དུ་སྦྱང་།། རྒྱ་སྤྱིན་རབ་ཡིན་མ་རྙེད་ན།།སྤྱིན་སད་ཁུ་དྭངས་བླུག་ལ་བསྡུ།། མགྱོགས་འདོད་མཚལ་ཕྱེ་སྤྱིན་ཆུར་སྦྱར།། གཡའ་མེད་སྣོད་དུ་དལ་བུས་མཉེ།།ཤེད་དྲག་ནག་པོར་འགྱུར་བས་ན།། མཚལ་ལ་མི་རྒན་ལག་སྟབས་གནད།།གང་ཡང་སྦྱར་ནས་འབྲི་བའི་ཚེ།། ཀ་པི་དྲུག་སྦྱོར་འདོད་པ་ན།།གཡའ་དྲི་མེད་པའི་སྣོད་གཙང་མར།། མཚལ་གྱི་སུམ་གཉིས་ཀ་པི་དང་།།སྤྱིན་ཆུ་སུམ་ཆ་ཙམ་གཅིག་བླུག། ཡུན་རིང་བར་དུ་ཉི་མར་བདུག། རྒྱ་ཚྭ་ཞོ་ཚད་ཚྭ་ལ་ནི།།ཚྭ་འདེབས་སྤོས་དཀར་ཐལ་ཙམ་བཏབ།། དེ་དག་ཡོན་ཏན་རིམ་བཞིན་དུ།།འོད་འཕྲོ་དམ་བྱེད་གཤེར་བག་གཅོད།། དམར་འཚེར་བདེ་ལ་སྐམ་རྩི་བྱེད།།འགྲིམ་དཀའ་སེར་ན་ཆུ་གཙང་བླུག། མདངས་སྐྱ་སྨུག་ན་ཀ་པི་བསྣན།།དེ་ལ་ཀ་པི་སྦྱོར་པའི་ཐབས།། དཔྱིད་དམ་སྟོན་མཇུག་བརྐོས་པ་ཡི།།ལུག་སུག་གད་བདར་ལེགས་བྱས་ལ།། ལྕགས་མིན་སྣོད་དུ་བཙོ་ཞིང་བཞུར།།ཚགས་བཙགས་གོང་གི་རྫས་རྣམས་བཏབ།། དལ་འཇམ་དཀྲུགས་ཤིང་མེ་ལ་གདུ།།སུམ་སྦྱོར་མཚལ་དང་ཀ་པི་ལ།། རྒྱལ་མོ་ཀ་ར་ཅུང་ཟད་འདེབས།།མདངས་ལེགས་དཀྱུས་ཀྱི་ལག་ལེན་ཏེ།། མཚལ་སྤྱིན་གཉིས་སྦྱོར་སྟབས་བདེའི་བཟོ།། གང་ཡང་མེ་ཡིས་མ་གདུང་གཅེས།།གཞན་ཡང་བྱ་ཡི་སྒོང་སྤྲི་དང་།། ཆུ་སེར་དྭངས་མ་སྦྱོར་བ་སོགས།།འཕྲལ་བདེ་ལེགས་ཀྱང་སྐྱོན་ཅན་སྤང་།། ལོ་གྲངས་ལོན་ཀྱང་མདངས་མ་ཡལ།།རླན་དང་ཕྲད་ཀྱང་འབྱར་འགོས་མེད།། བཀྲག་སྣུམ་འོད་ལྡན་མཚལ་སྣག་ནི།།གླེགས་བམ་འབྲི་བའི་བཅུད་མཆོག་གོ། དེ་ལྟར་ཡང་ངག་རྒྱུན། སྣག་ཤོག་སྨྱུ་གུ་མི་གཟོབ་པར།།ཡི་གེ་གཟོབ་འདོད་ཡིག་མཁན་འཁྲུལ།། ཞེས་བྱ་བ་ཡིན་པས་རྒྱུ་དང་ལག་ཆ་གཟབ་ཅིང་།སྣག་ལམ་གཙང་བ། འབྲུ་ཁོག་སྒྲོས་པ།ཆད་ལྷག་ནོར་འཁྲུལ་མེད་པའི་དག་པ་གསུམ་ནི་འབྲི་བྱ་ཆེ་ཕྲ་ཀུན་ལ་ཤིན་ཏུ་གཅེས་སོ།།གོང་རིམ་ཡང་གསུང་རབ་ཆེན་པོ་དག་ལ་གཟབ་ཆེན་གཟབ་ཆུང་། རྒྱ་གར་མཁས་པའི་གཞུང་འགྲེལ་རྣམས་འབྲུ་ཆེན་།བོད་ཀྱི་གཞུང་ལུས་རྣམས་འབྲུ་ཆུང་སྟེ་ཆེ་བའི་དབང་གིས་འཛོལ་མེད་དུ་འབྲི་བ་གནའ་བོའི་ལུགས་བཟང་ཡིན་ཅིང་།ཡིག་གསར།བརྡ་ཡིག གཏེར་ཡིག་གིས་མཚོན་པའི་ཡིག་རིགས་གཞན་པ་ནི་མཐའ་ཡས་པས་འདིར་སྤྲོར་མི་ལངས་སོ།།


阅读252
分享
写下您的评论吧