ཆུང་རྒྱུད་ཚེ་དབང་རྣམ་རྒྱལ།

ཆབ་མདོའི་ཡིག་མཁན་ཆུང་རྒྱུད་ཚེ་དབང་རྣམ་རྒྱལ་གྱི་ཡིག་གཟུགས་བརྩམས་ཆོས་འགྲེམ་སྟོན་ཁང་གསར་བ།

     ཁོང་ནི་བོད་ལྗོངས་ཡིག་གཟུགས་མཁས་པ་མཐུན་ཚོགས་ཀྱི་ཚོགས་མི་དང་། ཆབ་མདོ་གྲོང་ཁྱེར་ཡིག་གཟུགས་མཛེས་རྩལ་མཁས་ཅན་ལྷན་ཚོགས་ཀྱི་ཚོགས་མི། ཀྲུང་གོ་ཡིག་རིས་སྒྱུ་རྩལ་མཁས་པ་མཐུན་ཚོགས་ཀྱི་ཚོགས་མི།   ཁྱུང་པོ་རྩེ་དྲུག་དགོན་གྱི་བཀའ་འགྱུར་གསེར་བྲིས་མའི་དབུ་མཛད།   སྟེང་ཆེན་རྫོང་ལས་རིགས་ལག་རྩལ་སློབ་གྲྭའི་དགེ་རྒན་བཅས་ཡིན།

     ཁོང་ནི་སྤྱི་ལོ1995ལོར་བོད་ལྗོངས་ཆབ་མདོ་གྲོང་ཁྱེར་སྟེང་ཆེན་རྫོང་ཁྲི་རྡོ་གྲོང་རྡལ་ཟམ་ཞིག་གྲོང་ཚོའི་ཆུང་རྒྱུད་ཚང་དུ་སྐྱེས། ལོ་ངོ་བདུན་གྱི་སྟེང་ནས་ཡབ་ཆུང་རྒྱུད་ཚེ་དབང་མཐར་ཕྱིན་གྱི་མདུན་ནས་ཡི་གེ་འབྲི་ཀློག་འདོན་གསུམ་དང་རིམ་གྱིས་ཡིག་གཟུགས་ལ་ཆེད་སྦྱངས་བྱས་ཏེ་མི་ལོ་བཅུ་ཕྲག་ལྷག་གི་རིང་དུ་ལུང་པ་གཅིག་དང་མི་ཚང་གཅིག་ནས་རྣམ་གཡེང་དང་རྩེད་རྒོད་དོར་ཏེ་གཞན་གང་ཡང་མ་ཕྱིན་པར་སློབ་གཉེར་ལ་འབད་པ་ལྷོད་མེད་བྱས། དེ་ལྟར་རྡོ་ལག་བརྒྱུད་དང་ཆུ་ལམ་ཞུགས་ཀྱི་དཔེ་བཞིན་ཡབ་ཆེན་གྱི་ལག་ཤེས་བུ་ལ་ཇི་བཞིན་འབྱོར་སྟབས་ད་སྐབས་ཁོང་ཉིད་ཡིག་གཟུགས་སྣ་ཚོགས་ལ་མཁས་ཤིང་ལྷག་པར་དུ་འབྲུ་ལྗིབ་གཟབ་གསུམ་ལ་ཁྱད་ཆོས་མངོན་པར་འཕགས་པས་ཕ་ས་ཁྱུང་ཡུལ་གྱི་བྲིས་པ་རྣམས་ཀྱི་ཡང་རྩེར་སོན་པ་ཞིག་ཡིན་ལ། ཡབ་ཀྱིས་ཕ་ནོར་བུ་ལ་འཕྲོད་པའི་ཐུགས་སྨོན་ལྷུན་གྱིས་གྲུབ་སྟེ་རྒྱུན་འཛིན་གྱི་ཐུགས་འགན་ཡོངས་སུ་ཁོང་ལ་སྤྲད་ཡོད། རྗེས་སུ་རྒྱལ་བ་གཤེན་རིན་པོ་ཆེ་དང་རྩེ་དྲུག་སློབ་དཔོན་ལུང་རྟོགས་བསྟན་པའི་རྒྱལ་མཚན་མཆོག་གཙོས་པའི་གོང་འོག་བར་གསུམ་གྱི་ལས་མི་ཐུན་མོང་གིས་མ་གྲོས་བསམ་པ་གཅིག་མཐུན་གྱི་སྒོ་ནས་ཚེ་དབང་རྣམ་རྒྱལ་རྒྱལ་བའི་བཀའ་རིན་པོ་ཆེ་འབྲི་བཞེང་གི་དབུ་མཛད་དུ་བསྐོས་བཞག་མཛད། 2018ལོར་སྟེང་ཆེན་རྫོང་གི་རྫོང་དཔོན་དང་རྫོང་སློབ་གསོ་ཅུད་ཀྱི་དབུ་ཁྲིད་རྣམས་དང་མི་ཆེན་ཁ་ཤས་ཀྱིས་སྟེང་ཆེན་རྫོང་ལས་རིགས་ལག་རྩལ་སློབ་གྲྭ་ལ་འཇོན་ནུས་ལྡན་ཞིང་མི་དམངས་ལ་ལྷག་བསམ་དཀར་བའི་ཡིག་གཟུགས་དགེ་རྒན་ཞིག་བདམ་པར་ཐུགས་གྲོས་ཡང་ཡང་གནང་བར་བརྟེན། རྒན་ཁོང་སློབ་གྲྭ་དེར་ཡིག་གཟུགས་ཆེད་སྦྱོང་འཛིན་གྲྭའི་དགེ་རྒན་དུ་གདན་ཞུས་བྱས། དེ་སྔོན་གསུང་རབ་རིན་པོ་ཆེ་པོ་ཏི་ཆེན་པོ་ཉི་ཤུ་ལྷག་བྲིས་ཟིན་པ་དང་།   སློབ་མ་བརྒྱ་ཕྲག་ལྷག་བསྐྱངས་མྱོང་ཡོད།

སློབ་སྦྱོང་གི་བརྒྱུད་རིམ།

     ཁོང་ལོ་ངོ་བདུན་གྱི་སྟེང་ནས་ཡབ་ཀྱི་མདུན་ནས་ཡི་གེ་འབྲི་ཀློག་འདོན་གསུམ་དང་རིམ་གྱིས་ཡིག་གཟུགས་ལ་ཆེད་སྦྱངས་བྱས་ཏེ་མི་ལོ་བཅུ་ཕྲག་གཉིས་ལྷག་ཟིན་ལ་སྤྱི་ལོ2016ལོར་ཁྱུང་ཡུལ་གྱི་གྲྭ་ས་ཆེན་མོ་ཁྱུང་པོ་སྟེང་ཆེན་དགོན་དུ་རབ་འབྱམས་དགེ་བའི་བཤེས་གཉེན་ཆེན་མོ་མདོ་སྔགས་རྒྱ་མཚོ་དང་ཤེལ་ཞིག་ཤེས་རབ་སྙིང་པོ་གཉིས་ཀྱི་དྲུང་ནས་བརྡ་སྤྲོད་སྲིད་པའི་སྒྲོན་མེ་དང་སྙན་འགྲེལ་ཨེར་སངས་ལྷ་མོ་བཅས་བརྡ་དག་སྙན་གསུམ་ལ་སྦྱངས་པ་མཛད།

བྱ་བའི་གྲུབ་འབྲས།

      བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་དང་། ཀྲུང་གོ་བའི་ཡིག་རིས་སྒྱུ་རྩལ་མཁས་པ་མཐུན་ཚོགས་ཀྱི་ཚོགས་མི། ཁོང་གིས་གཙོ་འགན་བཞེས་པའི༼་   ཞིང་བོད་ཡིག་གཟུགས་ཀུན་བཏུས་གསེར་ཐང་ཆེན་མོ   ༽    འཛམ་གླིང་ཅི་ཉི་སིའི་ཟིན་ཐོར་ཚུད། རྒྱལ་ཡོངས་ཡིག་གཟུགས་འགྲན་བསྡུར་ཐེངས་གཉིས་ལ་ཨང་གཉིས་པའི་བྱ་དགའ་ཐོབ་པ་དང་། བོད་རང་སྐྱོང་ལྗོངས་ཀྱི་ཡིག་གཟུགས་འགྲན་བསྡུར་སྐབས་ཨང་དང་པོའི་བྱ་དགའ་ཐོབ། ཆབ་མདོ་གྲོང་ཁྱེར་ཡོངས་ཀྱི་ཡིག་གཟུགས་འགྲན་སྡུར་ཆེན་མོའི་ཁྲོད་ནས་ཨང་དང་པོའི་བྱ་དགའ་ཐོབ། བོད་ལྗོངས་བརྙན་འཕྲིན་ལས་ཁུངས་དང་སི་ཁྲོན་ཁམས་པའི་བརྙན་འཕྲིན་ཁང་སོགས་ཀྱིས་བཅར་འདྲི་བྱས།

བརྩམས་ཆོས།

      གནའ་དཔེ་པོ་ཏི་ཆེན་པོ་ཉི་ཤུ་ལྷག་བཤུ་འབྲི་བྱས་པ་དང་།ད་དུང་གནའ་རབས་བོད་ཀྱི་ཕྱག་རྒྱུན་རྩལ་ཆེན་ཁྱུང་གི་སྨྱུག་འགྲོས་པར་ཐེངས་གཉིས་དང་འབྲུ་མའི་ཡིག་གཟུགས་བརྙན་ལམ་དཔེ་ཁྲིད་ལེའུ་ཆ་ཚང་བཅས་ཡོད།

སྤྱི་ཁྱབ་ལྟ་སྐུལ་བ། རྟ་མགྲིན་མགོན་པོ།

རྩོམ་སྒྲིག་པ། དཔལ་མགོན་ཚེ་རིང་།

ཞུ་དག་པ། བཀྲ་ཤིས་དོན་གྲུབ།

པར་རིས་སྒྲིག་བཟོ། མགོན་པོ་དོན་གྲུབ།