གཞུང་བྲིས་དབུ་མེད་ཡིག་གཟུགས་འབྲི་ཚུལ་གྱི་མན་ངག་བཞུགས་སོ།།

(བཀྲ་ཐང་བསྟན་པའི་ཉི་མའི་གསུང་།)

དབུ་མེད་འབྲི་ལ་ཐོག་མར་རུས་པ་ཐིག།

བར་དུ་ཤ་ཉམས་མཐའ་མར་མཛེས་ཉམས་བཅས།།

གལ་པོ་ཆེ་ཡི་ཚུལ་གསུམ་མ་བསླབ་པར།།

འདྲ་ཆགས་ཡིག་གཟུགས་ཕྱག་རྩེར་སོན་ཐབས་བྲལ།།

དེ་ཡང་རུས་པ་ཐིག་གི་རྣམ་གཞག་ལ།།

ཡི་གེའི་དཔངས་ཚད་ཇི་བཞིན་ཤེས་དགོས་ཏེ།།

ཀ་ཁ་ནས་བཟུང་ཐིག་རིས་མ་སྤང་པར།།

ཆ་རུ་བགོས་ཏེ་མང་ལས་ཉུང་དུ་འཕྲི།།

དཔེར་ན་ཀ་ཁར་སོར་ཆ་དྲུག་ཡིན་ན།།

དེ་ནས་རིམ་བཞིན་ཆ་རེ་འདོར་བྱ་ཞིང་།།

ཡིག་གཟུགས་རིམ་པས་ཆུང་དུ་འགྲོ་བ་ཡིན།།

ཀ་ཁ་ཟློས་ཧྲལ་ཡ་བཏགས་ར་བཏགས་དང་།།

ཚུགས་རིང་བཅས་པར་ཐིག་རྐང་བཞི་རེ་སྟེ།།

མགོ་ཐིག་དཀྱིལ་ཐིག་སྨད་ཐིག་རྐང་ཐིག་ཅེས།།

སོར་གསུམ་ལུས་དང་སོར་བཞི་རྐང་པར་བཞག།

སྔ་སྲོལ་ཡིན་ཡང་དེ་འདྲ་རང་བྲིས་ན།།

བུ་ཆུང་ཡིག་རྐང་འཐེན་པར་དུས་ཚོད་ཟད།།

སྣག་དང་ཤོག་བུས་ཨ་མའི་ཕྱག་ཁུག་སྟོང་།།

དེ་ན་ཆ་གཉིས་བགོས་ན་མི་ལེགས་སམ།།

ཚུགས་ཐུང་འབྲི་སྐབས་མགོ་བོ་རྐང་གསུམ་ལས།།

དཀྱིལ་ཐིག་མི་དགོས་མིག་ཚད་རན་པོ་བྲི།།

ཚུགས་མ་འཁྱུག་ནས་མགོ་ཐིག་ཁོ་ན་སྟེ་།།

རིམ་གྱིས་འབྱོང་ན་ཐིག་ཀྱང་བསྐྱུར་བས་ཆོག།

གཉིས་པ་རུས་ལ་ཤ་ཉམས་བཏོན་ཅེས་པ།།

སྨྱུ་གུའི་ཁ་ཡིས་ཁེབས་པའི་ནག་ཆ་དང་།།

སྟོང་པར་ལུས་པའི་དཀར་ཆ་གཉིས་པོ་ལ།།

ཡི་གེའི་གཟུགས་ཀྱི་ཞེང་ཚད་རྫོགས་འགྱུར་ཏེ།།

ནག་ཆ་དཀར་ཆ་གཤིབ་པ་མང་ཉུང་གི།

མི་གེ་སུམ་ཅུའི་ཞེང་གི་བྱེ་བྲག་དབྱེ།།

ཨ་ཡིག་ཞེང་ཚད་ཆ་དགུ་ལྡན་པ་དང་།།

ཀ་ཁ་ག་ཆ་ཕ་མ་ཚ་ལ་ཡ།།

དགུ་ནི་ཞེང་ཚད་ཆ་ཚད་བདུན་དུ་ངེས།།

ཉ་ཐ་ན་པ་བ་ཝ་འ་ཤ་ས།།

དགུ་ལ་ཞེང་གི་ཆེ་ཆུང་ཆ་ཚད་ལྔ།།

ད་དང་ང་གཉིས་ཞེང་དུ་ཆ་གསུམ་ཡོད།།

ཅ་ཙ་ཟ་གསུམ་དཀྱུས་འཐེན་ཆ་གསུམ་ལ།།

མགོ་སྦོ་ཆ་གཉིས་བསྣན་པ་ཆ་ལྔ་ཡིན།།

ཇ་ཛ་ཏ་གསུམ་གཞུང་ཤིང་འཁྱོགས་པ་དང་།།

ཟག་མཆུའི་ཕུབ་ཀྱི་གུར་དང་ཚེག་ཐུང་བཅས།།

ཞེང་གི་ཚད་ནི་ཆ་ལྔ་དག་དང་མཚུངས།།

ར་ཧའི་གཡས་གཡོན་བར་ལ་ཆ་གསུམ་དང་།།

ཚེག་དང་དཀར་ནག་བསྡོམས་ཏེ་ཆ་ལྔ་ཡིན།།

ཁ་ཞེང་རིམ་པར་ཆུང་ན་ཆ་ཡང་ཆུང་།།

ཐོག་མར་དཀྱུས་སུ་རིང་བར་ཡོད་པ་ནས།།

རིམ་གྱིས་ཕྲེད་དུ་ལེབ་མོར་འགྱུར་འགྲོ་བ།།

ཤ་ཉམས་ལེགས་པར་ཐོན་པའི་གོ་རིམ་ལ།།

སྨྱུག་འཛིན་འདོད་པས་ནན་དུ་སྦྱོང་བར་རིག།

གསུམ་པ་ཤ་ལ་མཛེས་ཉམས་འདོན་པའི་ཐབས།།

ན་ཆུང་བྱད་བཞིན་བཀྲུས་པས་དག་ཅིང་གཙང་།།

རྒྱན་དང་གོས་གསར་བཀླུབས་པས་མཛེས་པ་བཞིན།།

འབྲི་བའི་སྐྱོན་ནི་སྤོངས་ལ་ཡོན་ཏན་སློབ།།

མགོ་བོ་ནས་འབྲུ་འདྲ་བ་ལེབ་མོར་སོང་ན་སྐྱོན།།

ཕྲེད་དུ་མགོ་གྲ་མ་སྙོམ་མཐོ་དམའ་ཤོར་ན་སྐྱོན།།

ནག་ཆ་ཚད་ལས་བརྒལ་ཏེ་ནག་ནོག་གྱུར་ན་སྐྱོན།།

དཀར་བའི་སྟོང་ཆ་མ་གཅིག་ཆེ་ཆུང་ཤོར་ན་སྐྱོན།།

ཕྲ་སྦོམ་དགོས་སར་མ་ཐོན་དབྱུག་པ་སར་དྲུད་སྐྱོན།།

སྦོ་ཐིག་ནང་དུ་མ་ཚུད་འཇོལ་རིང་སོང་ན་སྐྱོན།།

རྐང་པ་སྲོང་མིན་པ་ནང་དུ་འཁྱོགས་ན་སྐྱོན།།

དཀྱུས་འཐེན་ཕྲེད་ལ་ཤོར་ཏེ་རང་ས་བརྒལ་ན་སྐྱོན།

སྒྲོམ་བུའི་ཟུར་ཆ་མ་དོད་སྒོར་སྒོར་བྲིས་ན་སྐྱོན།།

ཚེག་གིས་སྦོ་ཐིག་མ་ནོན་གཟུགས་ལས་ཐུང་ན་སྐྱོན།།

བརྩེགས་པ་ཅི་ཡང་མ་སྙོམས་མགོ་ཆེ་མགོ་ཆུང་སྐྱོན།།

འདོགས་པ་རང་བཞིན་མ་ལྡེམ་ཧྲེང་པོར་སོང་ན་སྐྱོན།།

ལག་གི་མཉེན་ཆ་མ་དོད་སྦྲུག་མཇུག་འདྲ་བ་སྐྱོན།།

དབྱངས་གནས་རན་པར་མ་སྦྱར་ཁ་ཐོར་སོང་ན་སྐྱོན།།

དེ་དག་ལ་སོགས་སྐྱོན་ནི་སྤངས་པའི་ཚེ།།

སྙོམས་ལེགས་གཟུགས་ཀྱི་མཛེས་མ་བྱོན་ནས་ནི།།

རང་ཡང་འབྲི་འདོད་གཞན་ཡང་འབྲི་འདོད་པའི།།

སྨྱུག་འཛིན་དབང་པོའི་ཕྲིན་ལས་འགྲུབ་པར་འགྱུར།།

ཞེས་བཀྲ་ཐང་བསྟན་པའི་ཉི་མའི་གསུང་ལས་དཔལ་ནཱ་ལེནྡྲའི་ཁ་སྤུ་ཅན་གྱིས་སྤྱི་ལོ་༢༠༢༢ལོར་བྲིས་པའོ།།

རྩོམ་སྒྲིག་འགན་ཁུར་བ། རྟ་མགྲིན་མགོན་པོ།

ཡིག་དཀར་ལ་ཕབ་མཁན། རྟ་མགྲིན་མགོན་པོ།