ལེགས་དཔལ་ཚེ་རིང་རྣམ་རྒྱལ་གྱི་མི་སྒེར་འགྲེམ་སྟོན་ཁང་།

     ལེགས་དཔལ་ཚེ་རིང་རྣམ་རྒྱལ་ནི་དཀར་མཛེས་ཁུལ་ལི་ཐང་རྫོང་གི་མི་ཞིག་ཡིན་ལ།   ད་ལྟ་སི་ཁྲོན་མི་རིགས་སློབ་གྲྭ་ཆེན་མོར་སློབ་སྦྱོང་བྱེད་བཞིན་ཡོད།   ཁོང་ཆུང་དུས་ནས་སྒྱུ་རྩལ་གྱི་རིག་གནས་ལ་དམིགས་བསལ་གྱི་སྤྲོ་བ་ཡོད་ཅིང་།   ལྷག་པར་དུ་བོད་ཀྱི་ཡིག་གཟུགས་སྒྱུ་རྩལ་ལ་གཞན་དང་མ་མཚུངས་པའི་དགའ་ཞེན་སྐྱེས་ཤིང་།   ཡིན་རུང་དེ་དུས་ཡིག་གཟུགས་སྒྱུ་རྩལ་ལ་མཚན་ཉིད་དང་ལྡན་པའི་ངོས་ཟུངས་ཤིག་མེད་སྟབས།   མ་ལག་དང་ལྡན་པའི་སྒོ་ནས་ཡིག་གཟུགས་ལ་སློབ་སྦྱོང་བྱས་མ་ཐུབ།   དམའ་འབྲིང་སླེབས་དུས་སློབ་གསེང་གི་དུས་ཚོད་བེད་སྤྱད་ནས་དགེ་རྒན་དམ་པ་བློ་བཟང་མགོན་པོ་ལས་ཚུགས་རིང་དང་དབུ་ཅན།   དགེན་བློ་བཟང་ཚེ་རིང་ལས་འབྲུ་ཚ་དང་འཁྱུག་ཡིགསྐུང་ཡིག་སོགས་སྦྱངས་བརྩོན་བྱས།   སློབ་འབྲིང་ལོ་གསུམ་མཐར་ཕྱིན་རྗེས་སི་ཁྲོན་ཞིང་ཆེན་བོད་ཡིག་སློབ་གྲྭར་རྒྱུགས་འཕྲོད་ཤིང་།   སློབ་གྲྭ་དེར་ལྷག་བསམ་ལྡན་པའི་དགེ་རྒན་དང་ཕུན་སུམ་ཚོགས་པའི་སློབ་སྦྱོང་གི་ཁོར་ཡུག་སོགས་མཐུན་རྐྱེན་ཆ་འཛོམས་པའི་སྐལ་བ་དང་བསྟུན།   ཁོང་གིས་བོད་ཀྱི་རིག་གནས་སློབ་སྦྱོང་གཙོ་བོར་འཛིན་ནས་རང་ཉིད་ཀྱི་དགའ་ཕྱོགས་ཀྱང་ཉམས་སུ་མ་བཅུག་པར་མུ་མཐུད་དུ་དགེན་དཔལ་བསྡུས་དང་དགེན་ཉི་མ་དཔལ་ལྡན།   དགེན་ཀུན་དགའ་རྒྱ་མཚན།   དགེན་ཟླ་དབྱངས་སོགས་ལ་བསྟེན་ནས་བོད་ཀྱི་ཡིག་གཟུགས་སྒྱུ་རྩལ་རང་ནུས་གང་ཡོད་ཀྱིས་སྦྱངས་བརྩོན་བྱས།   དགེ་རྒན་དེ་ཚོགས་ཀྱིས་ཐུགས་ཁུར་དང་སྐུལ་མ་འོག་བྲིས་ཀྱི་ལག་རྩལ་ཇེ་འཕེལ་བྱུང་བར་མ་ཟད།   སྲོལ་རྒྱུན་གྱི་ཡིག་གཟུགས་ཀྱི་མཛེས་རྟོགས་དང་དེང་རབས་ཀྱི་མཛེས་རྟོགས་དང་ཟུང་དུ་འབྲེལ་ནས་ཁོང་གི་ཡིག་གཟུགས་བརྩམས་ཆོས་ནི་སྲོལ་རྒྱུན་མ་བོར་ཞིང་དེང་རབས་ཀྱི་རིག་གནས་ཡང་ལྡན་པས་མཚོན་དོན་དང་།   འཆར་ཡན།   གུ་ཡངས་བཅས་ཀྱི་ཁྱད་ཆོས་མངོན་གསལ་ལྡན་ནོ། །

    ལི་ཐང་རྫོང་ན་རོའི་ཁྱིམ་རིག་གནས་སློབ་གསོ་མཐུན་ཚོགས་ཀྱི་རིག་རྩལ་བྱེད་སྒོ་སྐབས་བཞི་པའི་ཡིག་གཟུགས་འགྲན་སྡུར་ལས་ཨང་དང་པོའི་གཟེངས་རྟགས་ཐོབ།   ལི་ཐང་རྫོང་སྐབས་གསུམ་པའི་སྒྱུ་རྩལ་དུས་ཆེན་དུ་ཡིག་གཟུགས་བརྩམས་ཆོས༼མི་ཆོས་ལེགས་བཤད།༽ཨང་གསུམ་པའི་གཟེངས་རྟགས་ཐོབ།      སི་ཁྲོན་ཞིང་ཆེན་བོད་ཡིག་སློབ་གྲྭའི་༢༠༢༣ལོའི་དབྱར་དུས་ཀྱི་ཆེད་སྦྱོང་ནུས་རྩལ་བཤམ་སྟོན་དུ།   གཟི་ཞེས་པའི་མཛེས་བྲིས་ཡིག་གཟུགས་ཨང་དང་པོའི་གཟཉངས་རྟགས་ཐོབ།     ༢༠༢༢ལོར་ས་སྐྱ་ལེགས་བཤད་བྲིས་གཟུགས་བརྩམས་ཆོས་༣་སི་ཁྲོན་ཞིང་ཆེན་བོད་ཡིག་སློབ་གྲྭས་ཉར་ཚགས་བྱས།       ༢༠༢༣ལོར་གསར་རྩོམ་དུ་ཞུགས་པའི༼བོད་ཡིག་བྲིས་ཐང་སྨི་བརྒྱད་ཅུ་ཅན༽བརྩམས་ཆོས་ཕུལ་བྱུང་དེ་སི་ཁྲོན་ཞིང་ཆེན་བོད་ཡིག་སློབ་གྲྭས་རྩ་ཆེན་ཉར་འཇོག་བྱས་ཡོད།

སྤྱི་ཁྱབ་ལྟ་སྐུལ་བ། རྟ་མགྲིན་མགོན་པོ།

གསར་འགོད་པ། དཔལ་མགོན་ཚེ་རིང་།

སྒྲིག་སྦྱོར་བ། དཔལ་མགོན་ཚེ་རིང་།