བསོད་ནམས་ཚེ་རིང་གངས་ལྗོངས་གསེར་སྨྱུག་ཡིག་མཁན།

ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་སྡུར་ལས་མི་༣༦གི་ཁྲོད་དུ་ཚུད་པའི་ཡིག་མཁན་གྱི་བརྩམས་ཆོས་འགྲེམ་སྟོན།

‍

     བསོད་ནམས་ཚེ་རིང་ནི1970ལོའི་ཟླ་5བའི་ཚེས་20ཉིན་བསང་ཆུ་རྗོང་ཁོ་ཚེ་ཞང་ཁོ་ཚེ་ལྷ་སྡེ་རུ་སྐྱེས། ཆུང་དུས་སུ་ཁོ་ཚེ་སློབ་ཆུང་ནས་ཡི་གེའི་འབྲི་ཀློག་ཐོག་མར་སྦྱངས་པ་སྟེ། སློབ་ཆུང་ལོ་རིམ་གསུམ་པའི་སྐབས་སུ་ཞང་བོ་འཇམ་དབྱངས་ཤེས་རབ་ལས་དབུ་ཅན་དང་དབུ་མེད་ཀྱི་ཡིག་གཟུགས་འབྲི་སྲོལ་ཐོག་མར་བསླབས། དེ་ནས་བསང་ཆུ་རྫོང་བོད་རིགས་སློབ་འབྲིང་དུ་སློབ་གཉེར་བྱེད་བཞིན་པའི་སྐབས་སུ། ཞོར་དུ་ལོ་ལྔ་དང་ཕྱེད་ཀྱི་རིང་ལ་བླ་བྲང་བཀྲ་ཤིས་འཁྱིལ་གྱི་འཇམ་པའི་དབྱངས་གུང་ཐང་བསྟན་པའི་དབང་ཕྱུག་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེའི་དྲུང་ཡིག་ཆེན་མོ་དགེ་བའི་བཤེས་གཉེན་རྗེ་ངག་དབང་རྒྱ་མཚོའི་དྲུང་ནས་དབུ་ཅན་དང་དབུ་མེད་ཀྱི་འབྲི་སྟངས་ལ་རིམ་པ་ལྟར་སྦྱངས།

        1990ལོར་གཙོས་མི་རིགས་དགེ་ཐོན་ཆེད་གཉེར་སློབ་གྲྭར་ཞུགས། དེའི་ཞོར་ལ་རྒན་སངས་རྒྱས་བཀྲ་ཤིས་ཀྱི་མདུན་ནས་ལོ་བཞི་ལྷག་ལ་ཡིག་གཟུགས་ཁྲིད་སྦྱོང་དང་ལས་བྱ་སྤྲད།   1993ལོར་གཙོས་བོད་རིགས་སློབ་འབྲིང་དུ་དགེ་རྒན་གྱི་ལས་གནས་བགོས། ད་ལྟའི་བར་དུ་དམའ་འབྲིང་དང་མཐོ་འབྲིང་གི་སྐད་ཡིག་སློབ་ཁྲིད་ཀྱི་ལས་ལ་གཞོལ་ཏེ་དུས་འདས།   ལོ་འདི་དག་གི་རིང་ལ་ལས་ཞོར་དུ་ཡིག་གཟུགས་འགྲན་སྡུར་མང་བོར་ཞུགས་ཏེ། ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་བསྡུར་སྐབས་གསུམ་པའི་ཁྲོད་བྱ་དགའ་ཨང་གཉིས་པ་ཐོབ་པ་སོགས་རྒྱལ་ཁབ་རིམ་པའི་བྱ་དགའ་གསུམ་དང་ཁུལ་རིམ་པའི་བྱ་དགའ་བཅུ་ལྷག་ཐོབ་ཡོད་ལ། དེ་ལས་ཡིག་གཟུགས་བརྩམས་ཆོས་གཉིས་རྒྱལ་ཁབ་རིམ་པའི་བདག་གཉེར་བརྩམས་ཆོས་སུ་ཚུད་ཡོད། ད་ལྟ་ཀན་ལྷོ་ཁུལ་ཡིག་མཁན་ཐུན་ཚོགས་ཀྱི་ཚོགས་གཙོ་གཞོན་པ་དང་དཔྱད་བརྗོད་པ། ཀན་སུའུ་ཞིང་ཆེན་ཡིག་གཟུགས་དང་རི་མོ་ཐུན་ཚོགས་ཀྱི་ཚོགས་མི།   གཞན་《ཡིག་གཟུགས་དང་མི་གཤིས་》སོགས་རིག་གཞུང་དཔྱད་རྩོམ་གསུམ་ལྷག་ཡོད་ལ། དེ་ལས《ཡིག་གཟུགས་དང་མི་གཤིས》ཞེས་པ་ཨ་མདོ་བརྙན་འཕྲིན་ཁང་གི་གླེང་སྟེགས་ལེ་ཚན་ནས་བོད་མདོ་དབུས་ཁམས་གསུམ་ལ་སྙན་སྒྲོན་ཞུས།