ཀྲུང་གོ་བོད་ཀྱི་ཡིག་གཟུགས་དྲ་བའི་ཡིག་གཟུགས་བརྩམས་ཆོས་དཔྱད་འདེམས་སྲོལ་ཡིག

སྐབས་གཉིས་པའི་ཐོན་མིའི་ཡིག་རྒྱུན་རྒྱལ་ཡོངས་བོད་ཀྱི་ཡིག་གཟུགས་འགྲན་བསྡུར་ཁྲོད་གཏན་འབེབ་བྱས་ཤིང་། སྐབས་གསུམ་བའི་བྱ་འགུལ་སྐབས་ལེགས་བཅོས་བྱས་ཤིང་ཟླ༦ཚེས༡༠ཉིན་གྱི་དཔྱད་འདེམ་གྲོས་ཚོགས་ཐོག་གྲོས་བསྡུར་བྱས་ཏེ་གྲོས་འཆམ་བྱུང་བ།

དང་པོ། 《ཀྲུང་གོ་བོད་ཀྱི་ཡིག་གཟུགས་དྲ་བའི་ཡིག་གཟུགས་བརྩམས་ཆོས་དཔྱད་འདེམས་སྲོལ་ཡིག་》ནི་ཀྲུང་གོ་བོད་ཀྱི་ཡིག་གཟུགས་དྲ་བའི་ཡིག་གཟུགས་བརྩམས་ཆོས་དཔྱད་འདེམས་བྱ་འགུལ་སྣ་ཚོགས་ལ་བཀོལ་སྤྱོད་བྱ་རྒྱུའི་ཡིག་ཆ་ཡིན།（གཤམ་ནས་སྲོལ་ཡིག་ཏུ་འབྲི།）

གཉིས་པ། སྲོལ་ཡིག་གི་སྤྱོད་ཡུལ་ནི།ཀྲུང་གོ་བོད་ཀྱི་ཡིག་གཟུགས་དྲ་བའི་བརྩམས་ཆོས་དཔྱད་འདེམས་ཀྱི་རིགས་ཚང་མ་ལ་ཐུན་མོང་དུ་བེད་སྤྱོད་གཏོང་རྒྱུ།

གསུམ།གོང་བཀོད་བྱ་འགུལ་ཁྲོད་ཡིག་གཟུགས་བརྩམས་ཆོས་ལ་དཔྱད་འདེམས་བྱེད་སྐབས་བྱ་འགུལ་ལ་ཞུགས་མཁན་གྱིས་ངེས་པར་དུ་སྲོལ་ཡིག་གི་ནང་དོན་ཁས་ལེན་པ་མ་ཟད།ལྷག་པར་དུ་སྲོལ་ཡིག་ལྟར་གདན་ཞུའི་དཔྱད་འདེམ་ཨུ་ཡོན་ལྷན་ཚོགས་ཀྱི་དཔྱད་འདེམས་མཇུག་འབྲས་དང་ཡིག་གཟུགས་བརྩམས་ཆོས་ལ་སྤེལ་བའི་དཔྱད་བརྗོད་སྣ་ཚོགས་ལ་ཡང་དག་པའི་གོ་བ་ལེན་པ་དང་དཔྱད་བརྗོད་སྤྱི་སྡོམ་ལ་བརྩི་འཇོག་བྱ་དགོས།

བཞི།དཔྱད་འདེམ་དང་དཔྱད་བརྗོད་མཇུག་འབྲས་ལ་བསམ་འཆར་ཡོད་ཚེ་ལུགས་མཐུན་གྱིས་སྒོ་ནས་འབྲེལ་གཏུག་བྱེད་པ་ལས་ཨུ་ཡོན་མི་སྒེར་ལ་གུས་ལུགས་མེད་པའི་གཏམ་སྤྱོད་སོགས་སྤེལ་མི་ཆོག

ལྔ།དྲ་ཚིགས་ཀྱི་བྱ་འགུལ་སྣ་ཚོགས་ལ་ཞུགས་མཁན་ཚང་མས་《ཀྲུང་གོ་བོད་ཀྱི་ཡིག་གཟུགས་དྲ་བའི་བརྩམས་ཆོས་དཔྱད་འདེམ་ཚད་གཞིའི》གཏན་འཁེལ་ནང་དོན་ཚང་མ་ཁས་ལེན་བྱས་པ་མཚོན་པ་མ་ཟད།ཚད་གཞི་ལྟར་དཔྱད་འདེམས་བྱས་བའི་མཇུག་འབྲས་ལེགས་ཉེས་གང་ཡིན་རུང་ཁས་ལེན་དང་མོས་མཐུན་བྱ་དགོས།མོས་མཐུན་མེད་ཚེ་ཀྲུང་གོ་བོད་ཀྱི་ཡིག་གཟུགས་དྲ་བའི་བྱ་འགུལ་ལ་ཞུགས་པའི་ཐོབ་ཐང་ཤོར་བ་ཡིན།

དྲུགཀྲུང་གོ་བོད་ཀྱི་ཡིག་གཟུགས་དྲ་བའི་བརྩམས་ཆོས་དཔྱད་འདེམས་ཀྱི་བྱ་བ་ཚང་མ་དཔྱད་འདེམས་ཨུ་ཡོན་ལྷན་ཚོགས་ཀྱིས་ཡུལ་དུས་གནས་སྐབས་དང་བསྟུན་པའི་ཐག་བཅད་ལྟར།དྲ་ལམ་མམ་ཡིག་སྐུར་དང་། དཔྱད་འདེམ་དགེ་རྒན་གྱི་མདུན་དུ་ངོ་གཏུགས་བྱེད་པ།ཡང་ན་དཔྱད་འདེམས་དགེ་རྒན་ཚུར་ལ་གདན་འདྲེན་ཞུ་བ་སོགས་ཀྱི་རྣམ་པའི་སྟེང་ནས་དཔྱད་འདེམས་བྱ་བ་བསྒྲུབ་རྒྱུ་ཡིན།

བདུན། དཔྱད་འདེམ་དགེ་རྒན་ནི་ལོ་ལྔ་རེ་ནས་གནས་ཚུལ་ལྟར་བསྐྱར་འདེམས་བྱེད་པའམ།ཁ་གསབ་གདན་ཞུ་བྱས་ནས་མི་སྣ་ཞེ་གཉིས་ཀྱི་གྲངས་ཀ་འདང་ངེས་བྱ་རྒྱུ།

བརྒྱད། བརྩམས་ཆོས་དཔྱད་འདེམ་ལ་དཔྱད་འདེམ་ཨུ་ཡོན་གྱི་སྤྱིའི་ཁ་གྲངས་ཀྱི་བརྒྱ་ཆ་སུམ་ཅུ་སོ་ལྔ་འདང་དུས་བརྩམས་ཆོས་དཔྱད་འདེམ་གྱི་བྱ་བ་སྤེལ་ཆོག་པ་མ་ཟད།དཔྱད་འདེམ་མཇུག་འབྲས་ཀྱང་ནུས་ལྡན་དུ་བརྩི་རྒྱུ་ཡིན།

དགུ།ཀྲུང་གོ་བོད་ཀྱི་ཡིག་གཟུགས་དྲ་བའི་བརྩམས་ཆོས་དཔྱད་འདེམ་ཨུ་ཡོན་ལྷན་ཚོགས་ཀྱིས་《ཀྲུང་གོ་བོད་ཀྱི་ཡིག་གཟུགས་དྲ་བའི་བརྩམས་ཆོས་དཔྱད་འདེམ་ཚད་གཞི》གཏན་འཁེལ་དང་ལེགས་བཅོས་གཏོང་རྒྱུ་ཡིན།

བཅུ། དཔྱད་འདེམ་ཚད་གཞིའི་ནང་དོན་དཔྱད་འདེམས་ཨུ་ཡོན་ལྷན་ཚོགས་ཐུན་མོང་གིས་གྲོས་བསྡུར་བྱས་ནས་བསྒྱུར་བཅོས་གཏོང་བ་ལས་མི་སྒེར་གྱིས་གང་འདོད་དུ་སྣོན་འཕྲི་བྱ་རྒྱུ་མིན།

      བཅུ་གཅིག   སྲོལ་ཡིག་འདི་གྲོས་བསྡུར་ཐག་གཅོད་བྱས་ཉིན་ནས་བཟུང་ལག་བསྟར་བྱ་རྒྱུ།

བཅུ་གཉིས། སྲོལ་ཡིག་དང་ཚད་གཞིའི་ནང་དོན་ཀྲུང་གོ་བོད་ཀྱི་ཡིག་གཟུགས་དྲ་བའི་རྩོམ་སྒྲིག་ཁང་གིས་དོན་འགྲེལ་བརྒྱབ་པ་ལྟར་རོ།།