རྫོང་སྔོན་བློ་བཟང་འཇིགས་མེད་ཀྱི་ཡིག་གཟུགས་བརྩམས་ཆོས་བདམས་བཀོད།

༼ ཁག་བདུན་པ། ༽

    རྫོང་སྔོན་བློ་བཟང་འཇིགས་མེད། སྨྱུག་མིང་ལ་གངས་རྩེ་སྨྱུག་ཏུ་འབོད། རེབ་གོང་རྩེ་ཁོག་གཡུ་རྔོག་སྡེ་བར་སྐྱེས། རྫོང་སྔོན་བཀྲ་ཤིས་ཆོས་རྫོང་གླིང་གི་ཚོགས་གྲལ་དུ་ཞུགས། སུམ་རྟགས་དག་གསུམ་དང་། སྙན་ངག་ཡིག་གཟུགས་སྣ་ཚོགས་ལ་སྦྱངས་བ་བྱས། 2006ལོར《ལང་ཚོའི་ཟུངས་ཁྲག》ཅེས་པའི་སྙན་དེབ་པར་བསྐྲུན་བྱས།སྙན་ངག་སྐོར་ཞིག《གངས་རྒྱན་མེ་ཏོག་སྤེལ་ནས་ལོ་འཁོར25ལོན་པའི་དཔེ་ཚོགས》དང་།《བོད་ཀྱི་རྩོམ་རིག་ཞིབ་འཇུག་དེབ་ཚོགས》སུ་བདམས།སྦྲང་ཆར་དུས་དེབ་ཀྱི“དམིགས་བསལ་འོས་སྦྱོར”ལེ་ཚན་དུ་སྙན་ངག་ཆེད་བཀོད་བྱས། 2007ལོར་རྒྱལ་ཡོངས་སྐབས་དང་བོའི་གངས་རྒྱན་མེ་ཏོག་རྟགས་མའི་རྩོམ་རིག་བྱ་དགའ་ཐོབ། རེབ་གོང་ཐུན་རིན་ས་ཁུལ་གྱི་ཡིག་གཟུགས་འགྲན་སྡུར་སྟེང་ཨང་དང་བོའི་བྱ་དགའ་ཐོབ། 2021ལོའི་ཀྲུང་གོ་བོད་ཀྱི་ཡིག་གཟུགས་དྲ་བའི“ཐོན་མིའི་ཡིག་རྒྱུན”རྒྱལ་ཡོངས་སྐབས་གཉིས་པའི་བོད་ཀྱི་ཡིག་གཟུགས་འགྲན་སྡུར་ཆེན་མོའི་ཁྲོད་ཨང་གཉིས་པའི་བྱ་དགའ་ཐོབ། རྨ་ལྷོ་ཁུལ་ནང་བསྟན་གླེང་སྟེགས་ཀྱི་སྐབས་བཞི་བའི་ཡིག་གཟུགས་འགྲན་སྡུར་སྟེང་ཨང་གཉིས་པའི་བྱ་དགའ་ཐོབ། ཝང་གཉིས་རྒྱལ་ཡོངས་སྐབས་བཞི་བའི་ཀྲུང་གོའི་ཡིག་རིས་འགྲན་སྡུར་སྟེང་ཨང་གསུམ་པའི་བྱ་དགའ་ཐོབ། རྨ་ལྷོ་ཁུལ་ནང་བསྟན་གླེང་སྟེགས་ཀྱི“མི་རིགས་མཐུན་སྒྲིལ་རྟགས་མའི”ཡིག་གཟུགས་འགྲན་སྡུར་སྐབས་གསུམ་པའི་སྟེང་ཕུལ་བྱུང་བྱ་དགའ་ཐོབ། རྩེ་ཁོག་རྫོང་རིག་གནས་ཁང་གིས་སྤེལ་བའི་ཡིག་རིས་དང་པར་ལེན་རྡོ་བརྐོས་སྒྱུ་རྩལ་བརྩམས་ཆོས་འགྲེམ་སྟོན་སྟེང་ཡིག་གཟུགས་བྱ་དགའ་ཐོབ། གཞན་ཡང་དགོན་གཞུང་དང་སྡེ་གཞུང་ནས་ཀྱང་ཡིག་གཟུགས་ཐད་བླངས་པའི་གྲུབ་འབྲས་སོགས་ལ་སྐུལ་ལྕག་གི་ཚུལ་དུ་གཟེངས་བསྟོད་དཔང་ཡིག་ཐོབ།《མཚོ་སྔོན་རེབ་གོང》《རེབ་གོང་སྒྱུ་རྩལ་ཞིབ་འཇུག》《ཝང་གཉིས་རྒྱལ་ཡོངས་སྐབས་བཞི་བའི་ཡིག་རིས་བྱ་དགའ་ཐོབ་པའི་བརྩམས་ཆོས་འདེམ་བསྒྲིགས》བཅས་དཔེ་དེབ་གསུམ་གྱི་སྟེང་ཡིག་གཟུགས་བརྩམས་ཆོས་བཀོད། གཞན་ཡིག་གཟུགས་བརྩམས་ཆོས་བདམས་བཀོད་སོ་སོར།《ཀྲུང་གོ་བོད་ཀྱི་ཡིག་གཟུགས་དྲ་བ》《མཚོ་སྔོན་བོད་ཡིག་གསར་འགྱུར།》《མཚོ་ལྷོའི་བོད་ཡིག་ཡིག་གཟུགས་འཕྲིན་སྟེགས》《རྨ་ལྷོ་བརྙན་འཕྲིན་ཁང་གི་འཕྲིན་སྟེགས》《ཁྱུང་ཨ་མྲྀ་ཏའི་ཡིག་གཟུགས་འཕྲིན་སྟེགས》སྟེང་བཀོད། གཞན་ཡང་བརྩམས་ཆོས་ཁག་ཅིག་ལ་ཉར་ཚགས་འཛིན་ཡིག་ཐོབ། རྨ་ལྷོ་ཁུལ་ཡིག་གཟུགས་མཐུན་ཚོགས་ཀྱི་ཚོགས་མི་དང་། མཚོ་སྔོན་ཞིང་ཆེན་སྲ་སྨྱུག་ཡིག་མཁན་མཐུན་ཚོགས་ཀྱི་ཚོགས་མི། རྨ་ལྷོའི་རྩོམ་པ་པོ་མཐུན་ཚོགས་ཀྱི་ཚོགས་མི་བཅས་ཡིན། ད་ལྟ་རྫོང་སྔོན་དགོན་པར་ཡིག་གཟུགས་དགེ་རྒན་གྱི་འགན་ཁུར་ནས་མུ་མཐུད་དུ་ཡིག་གཟུགས་སྒྱུ་རྩལ་ལ་ཧུར་བརྩོན་བྱེད་བཞིན་ཡོད།