2020ལོའི་སྤྱི་ཟླ1ཚེས་15ཉིན་ཀན་སུའུ་ཞིང་ཆེན་ཀན་ལྷོ་ཁུལ་ཨུ་དྲིལ་བསྒྲགས་པུའུ།   ཀན་ལྷོ་ཁུལ་རིག་གནས་རླུང་འཕྲིན་བརྙན་འཕྲིན་དང་ཡུལ་སྐོར་ཅུས་ཀྱིས་གཙོ་གཉེར་བྱས་པའི“ང་ཚོའི་ཀྲུང་གོའི་ཕུགས་འདུན”རིག་གནས་ཁྱིམ་ཚང་ཁྲི་ལ་སྐྱོད་པ་ཅེས་པའི་2020ལོའི་ཀན་ལྷོ་བོད་རིགས་རང་སྐྱོང་ཁུལ་རིག་གནས།   ཚན་རྩལ།   འཕྲོད་བསྟེན། བཅའ་ཁྲིམས་‘ཤང་བཞི་རུ་བསྐྱོད་རྒྱུའི’བྱེད་སྒོའི་འགོ་ཚུགས་མཛད་སྒོ་དང་དཔྱིད་གསར་དུས་ཆེན་བསུ་བའི་རིག་རྩལ་འཁྲབ་སྟོན་གཙོས་གྲོང་ཁྱེར་ཤམ་བྷ་ལ་རིག་གནས་ཐང་ཆེན་དུ་སྤེལ།

          ཁུལ་ཨུའི་དྲུང་ཆེ་གཞོན་པ་དབྱང་ཝུའེ་ཏུང་གིས་མཛད་སྒོར་གཙོ་སྐྱོང་གནང་བ་དང་།   ཁུལ་སྲིད་གཞུང་གི་ཁུལ་དཔོན་གཞོན་པ་ཝང་ཧྥང་གིས་ཤིས་ཚིག་ཕུལ།   དེ་དང་འབྲེལ་མཛད་སྒོ་དངོས་སུ་འགོ་ཚུགས་པ་ཁྱབ་བསྒྲགས་གནང་།

       ཐེངས་འདིའི་བྱེད་སྒོས“ང་ཚོའི་ཀྲུང་གོའི་ཕུགས་འདུན”ཞེས་པ་བརྗོད་དོན་གཙོ་བོར་བྱས་པའི་དམིགས་ཡུལ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་།   སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཀན་སུའུ་ཡི་གསུང་བཤད་གལ་ཆེན་གྱི་དགོངས་དོན། ཏང་གི་ཚོགས་ཆེན་བཅུ་དགུ་པ་དང་། སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ། གསུམ་པ། བཞི་པ་བཅས་ཀྱི་དགོངས་དོན་སློབ་སྦྱོང་དང་ལག་བསྟར་དོན་འཁྱོལ་གཏིང་ཟབ་བྱས་ནས་ཁུལ་ཡོངས་ཀྱི་རྒྱ་ཆེའི་རིག་གནས་རིག་རྩལ་ལས་དོན་པས་གཞི་རིམ་ལ་ཁ་ཕྱོགས་པ་དང་མང་ཚོགས་ལ་ཞབས་འདེགས་ཞུ་རྒྱུར་ཁྲིད་སྟོན་བྱ་རྒྱུ་དེ་རེད།   སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་དང་སྒྱུ་རྩལ་བརྩམས་ཆོས་ལ་བརྟེན་ནས་མི་དམངས་མང་ཚོགས་ཀྱི་རིག་གནས་འཚོ་བའི་ཐད་ཀྱི་དགོས་མཁོ་གསར་པ་དང་རེ་སྒུག་གསར་པ་ཟམ་མི་ཆད་པར་སྐོང་བ་དང་། རིག་གནས་ཀྱི་ཐོབ་ཚོར་དང་། བདེ་སྐྱིད་ཀྱི་ཚོར་སེམས། བདེ་སྐྱིད་དང་མཛེས་སྡུག་ལྡན་པའི་ཀན་ལྷོའི་འཛུགས་སྐྲུན་དང་དམངས་ཕྱུག་ཁུལ་དར་གྱི་རྣམ་པ་གསར་པ་གཏོད་པའི་མཉམ་ཤུགས་ཆེན་པོ་ཟམ་མི་ཆད་པར་ཆེ་རུ་གཏོང་རྒྱུ་དེ་ཡིན། དེ་བས་དཔྱིད་གསར་དུས་ཆེན་འཆར་ཉེ་བའི་མཚམས་སུ་ཁུལ་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་དུས་ཆེན་གྱི་རྣམ་པ་གསར་བ་ཞིག་འདོན་སྤྲོད་བྱས་ཡོད།

     བྱེད་སྒོ་སྤེལ་ཡུལ་དུ་འབྲེལ་ཡོད་ཚན་པ་ཁག་གིས་སྨན་རིན་མི་དགོས་པར་སྨན་བཅོས་འཕྲོད་བསྟེན་དང་།   ཚན་རིག    བཅའ་ཁྲིམས་ཀྱི་ཤེས་བྱ་སོགས་དྲིལ་བསྒྲགས་དང་། ཡུལ་སྐོར། འཆལ་རྡུང་ལོག་སེལ། མངོན་མིན་རིག་གནས་ཤུལ་བཞག་སྲུང་སྐྱོང་། རིག་དངོས་སྲུང་སྐྱོང་སོགས་དྲིལ་བསྒྲགས་བྱས་ལ་འབྲེལ་ཡོད་དཔྱད་ཡིག་3000ལྷག་ཙམ་འདོན་སྤྲོད་བྱས་པ་རེད། དེ་དང་ཆབས་ཅིག་ཁུལ་བོད་ཀྱི་གླུ་གར་ཁང་དང་རིག་གནས་ཁང་སོགས་ཀྱིས་ཡུལ་དངོས་སུ་རིག་རྩལ་འཁྲབ་སྟོན་བྱས་པ་མ་ཟད། ཁུལ་བོད་ཀྱི་ཡིག་གཟུགས་མཐུན་ཚོགས་ཀྱིས་བྱེད་སྒོའི་ཁྲོད་རོང་འབྲོག་མང་ཚོགས་ལ་ལོ་སར་གྱི་རྟེན་འབྲེལ་དུ་ཤིས་ཚིག་དང་སྒོ་དར་སྣ་ཚོགས་ཅི་འདོད་དུ་བྲིས་ནས་དགོས་མཁོ་ཅན་གྱི་འདུན་པ་ཁེངས་པར་བྱས།

     ལོ་འདི་འགའི་རིག་གནས་དྲིལ་བསྒྲགས་ཀྱི་བྱ་འགུལ་ལ་གཞིགས་ན།   ཀན་ལྷོ་བོད་རིགས་རང་སྐྱོང་ཁུལ་ཡོངས་སུ་བོད་ཀྱི་ཡིག་གཟུགས་སྒྱུ་རྩལ་ལས་དོན་དབྱར་མཚོ་ལྟར་རྒྱས་ཤིང་། རོང་འབྲོག་མང་ཚོགས་དང་ལས་བྱེད་པ། འཐབ་ཕྱོགས་སོ་སོའི་ཤེས་ཡོན་པ། དགོན་སྡེ་ཁག་གི་དགེ་འདུན་པ། སློབ་གྲྭ་ཆེ་འབྲིང་ཆུང་གསུམ་གྱི་སློབ་མ། ཁེ་ལས་པ་དང་ཡུལ་སྐོར་བ་སོགས་ཀྱིས་བོད་ཀྱི་ཡིག་གཟུགས་སྒྱུ་རྩལ་ལ་སྔར་ལས་ལྷག་པའི་རྒྱུས་ལོན་དང་སྤྲོ་སྣང་། དགའ་ཞེན་སོགས་མངོན་གསལ་དོད་པོ་བྱུང་ཡོད་པ་མ་ཟད། ཡིག་གཟུགས་ཀྱི་དགོས་མཁོ་མངོན་གསལ་གྱིས་ཇེ་ཆེར་གྱུར་བ་དང་། ཡིག་གཟུགས་ཀྱི་རིན་ཐང་སྔར་ལས་ལྷག་པས་ཇེ་མཐོར་སོང་ཡོད།