རྒྱལ་ཁབ་རིམ་པའི་གཟུགས་མེད་ཤུལ་བཞག་རིག་གནས་བོད་ཀྱི་ཡིག་གཟུགས་གྲགས་ཅན་ཁྱུང་བྲིས་སམ་སྙེ་བྲིས་ཀྱི་བྲིས་རྒྱུན་མདོ་ཁམས་སུ་སྤེལ་བ།

           དེ་ཡང་བོད་ཀྱི་ཡིག་གཟུགས་ཁག་ལས་བོད་ཀྱི་གཞུང་སྤྱོད་ཡིག་གཟུགས་གྲགས་ཅན་རྒྱལ་ཁབ་རིམ་པའི་ཤུལ་བཞག་རིག་གནས་ཁྱུང་བྲིས་སམ་སྙེ་བྲིས་རྒྱུན་འཛིན་པ་རྒན་སྙེ་བུ་བཀྲ་ཤིས་དོན་གྲུབ་ལགས་དང་། སྙེ་བྲིས་ཆེད་མཁས་པ་རྒན་བསོད་ནམས་བཀྲ་ཤིས་རྣམ་གཉིས་ཆེད་དུ་དབུས་ལྷ་ལྡན་ནས་མདོ་ཁམས་མགོ་ལོག་གངས་ལྗོངས་དར་རྒྱས་ཀུན་ཕན་སྨན་རྩིས་སློབ་གླིང་དུ་གདན་ཞུ་བྱས་ཏེ་ཉིན་ཉི་ཤུའི་རིང་ལ་ཟབ་སྦྱོང་འཛིན་གྲྭ་བསྡུས། རྒན་རྣམ་གཉིས་ཀྱིས་སྙེ་བྲིས་ཀྱི་བྱུང་བ་དང་ཐུན་མིན་ཁྱད་ཆོས་སོགས་སྦ་གསང་མེད་པར་ལྷུགས་པར་བསྩལ་བའི་བཀའ་དྲིན་བསྐྱངས་པ་དང་། གཞན་སྐུ་ངལ་ལ་མ་འཛེམ་པར་ནངས་སྔ་དགོང་འཕྱི་གནང་ནས་སློབ་ཚོགས་ལ་བསྟུད་མར་བྲིས་གཟུགས་ཁྲིད་གནང་དང་སྙུ་གུ་བཟོ་སྟངས། མཐར་ཆེད་རྒྱུགས་བླངས་ནས་བྲིས་ཚུགས་སོ་སོར་ཨང་རིམ་དང་འབྲིང་སོགས་དགར་ནས་གཟི་བརྗིད་མཚན་སྙན་གྱི་དཔང་ཡིག་དང་གཞན་དག་ལ་རྟིང་སྐུལ་གྱི་གསུང་བཤད་གནང་། སྤྱི་ནས་དགེ་སློབ་ཡོངས་ནས་ཡིག་གཟུགས་འགྲེམ་སྟོན་དང་མཛད་སྒོ་བསྡུས་ཏེ་གླིང་དེའི་སློབ་སྤྱི་པ་རྒན་ཚུལ་ཁྲིམས་དར་རྒྱས་ཀྱིས་ཐེངས་འདིའི་བསླབ་འབྲས་ཐད་བསྔགས་བརྗོད་དང་བཀའ་དྲིན་ཞུ་གསོལ་སོགས་གསུང་བཤད་གལ་ཆེན་དང་འབྲེལ་སློབ་གླིང་སྤྱིའི་ཡིག་གཟུགས་དགེ་རྒན་དུ་གདན་ཞུ་གནང་བའི་དཔང་ཡིག་ཕུལ་བ་སོགས་རྒྱལ་ཁ་དང་གྲུབ་འབྲས་ངང་སྐབས་ཐོག་མཇུག་ལེགས་པར་སྒྲིལ་བའོ། །