མཁས་དབང་ཚེ་ཏན་ཞབས་དྲུང་ངམ་རྗེ་འཇིགས་མེད་རིག་པའི་བློ་གྲོས་སམ་ངག་དབང་དབྱངས་ལྡན་རིག་པའི་འདོད་འཇོ་མཆོག

       དུས་རབས་བདུན་པའི་སྟོད་ཀྱི་ཆར་སློབ་དཔོན་ཐོན་མི་སམ་བྷོ་ཊས་བོད་ཡིག་གསར་དུ་བཟོས་པ་ནས་བཟུང་སྟེ། རིམ་གྱིས་བཟབས་ནས་འབྲི་དགོས་པ་ལ་གཟབ་མའི་ཡི་གེ་དང་། དེ་ཙམ་གབ་མི་དགོས་ཤིང་མགྱོགས་པོར་བྲིས་ཆོག་པ་ལ་གཤར་མའི་ཡི་གེ་ཞེས་འབྲི་ཚུལ་རིགས་གཉིས་བྱུང་། ད་ལྟ་གཟབ་མའི་ཡི་གེ་ལ་དབུ་ཅན་དང་། གཤར་མའི་ཡི་གེ་ལ་དབུ་མེད་ཀྱི་ཡི་གེ་ཟེར། དབུ་ཅན་དང་དབུ་མེད་ཟེར་དོན་ནི་ཡི་གེ་ལ་མགོ་འཐེན་ཡོད་པ་དང་མེད་པའི་སྒོ་ནས་བཏགས་པ་ཡིན། དེས་ན་བོད་ཡིག་ཐོག་མར་འབྲི་སྦྱོང་བྱེད་དུས་གོ་རིམ་དང་ལྡན་དགོས་པའི་ཚུལ་དང་། སྔོན་བྱོན་ཡིག་མཁན་རྣམས་ཀྱིས་ཚུལ་ཇི་ལྟར་དུ་དར་སྤེལ་བཏང་བ་དང་། དེ་ལ་བརྟེན་ནས་ཐབས་གང་གིས་ཡིག་གཟུགས་སྦྱོང་བའི་ཚུལ་ཏེ། ཚན་པ་གསུམ་གྱི་སྒོ་ནས་ཤེས་དགོས།

       དང་པོ། གོ་རིམ་གྱི་དབང་དུ་བཏང་ན་ཐོག་མར་དབུ་ཅན་གྱི་ཀ་ཁ་སུམ་ཅུ་ཇི་ལྟར་འབྲི་ཚུལ་དང་། དེ་ནས་རིམ་པར་དབྱངས་བཞིའི་མཚོན་བྱེད་གི་གུ་ཞབས་ཀྱུ་འགྲེང་བུ་རྣ་རུ་རྣམས་སྦྱོར་ཚུལ། ར་ལ་ས་ཡི་མགོ་ཅན་རྣམས་འདོགས་ཚུལ། ཡ་ར་ལ་ཝའི་འདོགས་ཅན་རྣམས་སྦྱོར་ཚུལ་ལ་བྱང་བར་སྦྱང་། དེ་ནས་མིང་དང་ཚིག་གི་ཕྲེང་བ་སྤེལ་བའི་ཚིགས་བཅད་དང་ཚིག་ལྷུག་འབྲི་བར་བསླབ། དེ་ལྟར་དབུ་ཅན་གྱི་འབྲི་ཚུལ་ལེགས་པར་བྱང་ཞིང་ཚད་དང་ལྡན་པར་གྱུར་པ་ན། དབུ་མེད་ཀྱི་ཡི་གེ་སྦྱོང་བའི་མགོ་འཛུགས་དགོས། དབུ་མེད་ཀྱི་ཡི་གེ་ནི་སྣ་ཁ་གཅིག་མ་ཡིན་པར་རྣམ་གྲངས་དུ་མ་ཞིག་ཡོད། དེ་ཡང་ཐོག་མར་སུག་རིང་འབྲི་ཚུལ་སྦྱོང་དགོས། དེ་ཅུང་ཟད་ལོབས་པ་ན་ཚུགས་ཡིག་ཟེར་བ་དབྱིབས་གྲུ་བཞི་ཅན་ཇི་ལྟར་འབྲི་ཚུལ་སྦྱོང་དགོས། དེ་ལོབས་ནས་བར་བྲིས་ཟེར་བ་ཡིག་གཟུགས་ཅུང་ཟད་ཟླུམ་པོ་བྱང་ན་འབྲི་སླ་བ་ཅན་དེ་སྦྱོང་དགོས། དེ་ལེགས་པར་ལོབས་པ་ན་རྒྱུགས་ཡིག་གམ་འཁྱུགས་ཡིག་ཇི་ལྟར་འབྲི་ཚུལ་སྦྱོང་དགོས། མདོར་ན་དབུ་མེད་ཀྱི་འབྲི་ཚུལ་ངེས་པར་རིམ་པ་འདི་ལྟ་བུ་ཞིག་ཡིན་དགོས།

      བོད་ཀྱི་ཐང་ཡིག་རྣམས་ལེགས་པར་སྦྱངས་པའི་རྗེས་ནས་ལེགས་སྦྱར་སྔགས་ཀྱི་དབྱངས་གསལ་དང་།བརྩེགས་མ་རྣམས་ཇི་ལྟར་འབྲི་ཚུལ་སྤྱི་དང་། ཁྱད་པར་དུ་འཐུག་པོ་ལྔ་དང་ལོག་པ་ལྔ། གི་གུ་ཕྱིར་ལོག་དང་ཀཻ་ཤ་ཅན་རྣམས་ཇི་ལྟར་འབྲི་ཚུལ་གཟབ་གཤར་གཉིས་ཀའི་སྟེང་ནས་གཟབ་ཐོན་དུ་སྦྱངས་པའི་མཐར་རིམ་གྱིས་ལཉྫ་དང་ཝརྟུ་སྦྱོང་བའི་བརྩོན་པ་ཡང་བསྟེན་དགོས། དེར་མ་ཟད་མཁས་པའི་ཕྱག་རྒྱུན་ལས་ཐོན་པའི་ཨང་གི་འབྲི་ཚུལ། མཚལ་ཐིག་དང་སྣག་ཐིག་འདེབས་ལུགས་སོགས་ཆ་ཕྲ་མོ་རྣམས་ཀྱང་གང་ཞིབ་ཀྱིས་ལེགས་པར་སློབ་དགོས། གོང་དུ་བཤད་པའི་རིམ་པ་དེ་ལྟར་མ་སྦྱངས་པར་ཅི་དྲན་གང་དྲན་གྱིས་རིམ་པ་འཆོལ་བར་སྦྱངས་ན་ནི་སྟག་མཆོང་སར་ཝ་སྐྱེས་མཆོང་མ་ཐུབ་པར་བར་ལམ་ནས་རྐེད་པ་ཆག་པའི་ཉེན་ཁ་རང་ཐོག་ཏུ་འབབ་ངེས་ཡིན་པ་ཤེས་པར་གྱིས་ཤིག

        གཉིས་པ། སྔོན་བྱོན་མཁས་པས་ཚུལ་ཇི་ལྟར་དུ་དར་སྤེལ་མཛད་པ་ནི། དབུ་ཅན་ལ་མཚོན་ན། མཁས་པ་ཆེན་པོ་ཁྱུང་པོ་གཡུ་ཁྲི་ཟེར་བས་ཐིག་ཁོག་ཏུ་དྲངས་ནས་སློབ་པའི་ལག་ལེན་སྤེལ། ཡི་གེ་སོ་སོ་ལ་ཆ་ཆེན་དང་ཆ་ཆུང་གི་རེའུ་མིག་བཟོས་ནས། ཡི་གེའི་མགོ་དང་། རྐེ་དང་། ལུས་དང་། རྐང་པ་དང་། མགོ་འདོགས་སོགས་ཐིག་གང་དང་གང་ལ་འབབ་པ་གཞིར་བཟུར་ནས་འབྲི་བ་མ་གཏོགས་སྣང་བ་གང་དྲན་བྱེད་མི་ཆོག   ཐིག་ཁོག་ཏུ་དྲངས་ནས་བྲིས་པའི་ཁྱད་ཆོས་ནི། རིང་ཐུང་དང་ཞེང་ཚད་སྙོམས་པ་དང་། མཐོ་དམན་ཚད་དང་ལྡན་པ་དང་། ཡ་ཡོ་ཀྱག་ཀྱོག་མི་ཤོར་བ་སྟེ་ཡོན་ཏན་གསུམ་ཚང་། དེ་ལྟ་བས་ན་ཐོག་མར་སྦྱོང་དུས་རབ་ཡིན་ན་ཐིག་ཁོག་ཏུ་དྲངས་ནས་འབྲི། དེ་མིན་ཡང་གང་གཟབ་ཀྱིས་ཡི་གེ་ཆེ་ཆུང་མི་ཤོར་བ་དང་། ཀ་ག་ཉ་ཏ་སོགས་རྐང་རིང་ཅན་གྱི་ཡི་གེ་རྣམས་དང་། ཇ་ཛ་སྟེ་རྐང་འབྲིང་གི་ཡི་གེ་དང་། ང་འ་ར་སོགས་རྐང་ཐུང་ཅན་གྱི་ཡི་གེ་རྣམས་ཀྱི་ཁྱད་གསལ་པོར་གཏོད་པ་གལ་ཆེ། ཡི་གེ་ཆེ་ཆུང་མི་ཤོར་བའི་ཚད་ནི་ཐིག་ཕྲེང་དང་པོ་ན་གང་ཡོད་ཀྱི་ཡི་གེ་དང་། ཐིག་ཕྲེང་འགབ་མ་ན་ཡོད་པའི་ཡི་གེ་གཉིས་དཔར་བརྒྱབ་པ་ལྟ་བུའི་ཇི་མ་ཇི་བཞིན་བྱུང་ཚེ་ཆེ་ཆུང་གི་ཚད་ལ་ལག་བྱང་བའི་རྟགས་ཡིན། དེ་མིན་ཐིག་ཕྲེང་དང་པོའི་ཡི་གེ་རྟ་ལྟ་བུ་དང་ཐིག་ཕྲེང་འགབ་མའི་ཡི་གེ་བྱི་ལ་ལྟ་བུ་ཡིན་ཚེ། ད་དུང་གཞི་ནས་ལེགས་པར་སྦྱོང་དགོས།

        སྤྱིར་ཡོན་ཏན་གང་དང་གང་སྦྱོང་བ་ལ་ཅུང་ཟད་ཙམ་ཤེས་པ་ནས་བཟུང་སྟེ། ཁེངས་དྲེགས་ང་རྒྱལ་གྱི་མགོ་འཕང་ཇེ་མཐོ་དང་། ཤེས་མེད་ཀྱང་ཤེས་རློམ་གྱིས་རང་གཞན་སླུ་བའི་ངན་སེམས་དེ་ཐོག་མཐའ་བར་གསུམ་དུ་སྤོང་ཅི་ཐུབ་དང་། ཅུད་ཟད་ཙམ་གྱིས་ཚིམས་ནས་སྔོན་སྐྱོད་བྱེད་པའི་གེགས་ཀྱི་དབང་དུ་མི་འགྲོ་བར་ཤེས་བྱའི་གནས་ལ་བརྩོན་པ་ཆུ་བོའི་རྒྱུན་བཞིན་བསྟེན་པ་འདི་རྣམ་པ་ཀུན་ཏུ་གལ་ཆེའོ།།

       གསུམ་པ། ཐོག་མར་ཡི་གེ་སྦྱོང་ཚེ།ལུས་བཟུར་ནས་མི་འདུག་པར་དྲང་ཐད་དུ་འདུག་ལུས་ཧ་ཅང་མི་དགྱེ་ཧ་ཅང་མི་སྒུར་བར་རན་པར་འདུག   ཅོག་ཙེ་བརྟན་པོ་མཐོ་དམའ་ཚད་དང་ལྡན་པ་ལ་བརྟེན་ནས་བྲི་བའི་གཞི་སམ་ཊའམ་ཀ་ཤིང་ཟེར་བ་གཞི་ནག་པོ་ལ་སྣུམ་སྲབ་བུ་ཞིག་བྱུགས་ནས་རྩམ་པའམ་ཕྱེ་བླུགས་པས་དཀར་པོར་བསྒྱུར། ཐིག་ཤིང་བཟུང་ནས་ཐིག་འདེབས་པའམ། ཐིག་སྐུད་ཀྱིས་ཐིག་འདེབས་པའི་འཕྲུལ་བཀོལ་ན་བཟང་། ཤིང་སྤེན་མའི་སྨྱུ་གུ་ལག་ལེན་ལྟར་བཟོས་པ་སྨྱུག་མཆུ་རིང་བ་ཅན་དབུ་ཅན་འབྲི་ན་རྒྱབ་ཀྱི་གཡས་ཟུར་ཅུང་ཟད་ཐུང་བའི་མཚམས་ནས་གྲིས་བཅད། དབུ་མེད་འབྲི་ན་དེ་ལས་ལྡོག་སྟེ་བཅད། དེ་ནས་ཁུངས་ལྡན་ཡི་གེའི་ལག་ལེན་ལ་མཁས་པའི་དགེ་རྒན་བཙལ་ནས། དེ་ལ་གུས་བཏུད་དང་བརྩི་བཀུར་ལྷག་བསམ་རྣམ་དག་ཡོད་པའི་སྒོ་ནས་འབྲི་སྦྱོང་གི་མགོ་རྩོམ། དེ་ཡང་སྨྱུག་ཁ་སོར་མོར་ཇི་ལྟར་འཛིན་ཚུལ་ནི། ཅུང་ཟད་བསྙལ་བའི་ཚུལ་གྱིས་འཛིན་དགོས། སྨྱུ་གུའི་མཚམས་གང་ནས་འཛིན་པ་དང་། སྨྱུག་ཁ་ཇི་ལྟར་ཁྲིད་ཚུལ། ཡིག་གཟུགས་ཀྱི་མགོ་དང་རྐེ་སོགས་སྔ་ཕྱིའི་འབྲི་རིམ། སྨྱུག་ཁ་བསྐོར་ནས་ཕྲ་སྦོམ་བཏོད་ཚུལ་རྣམས་ནི་གཙོ་བོ་དགེ་རྒན་གྱི་ཕྱག་ཁྲིད་ལ་བརྟེན་ནས་བསླབ་ན་མ་གཏོགས་ཡིག་ལམ་ནས་ཅི་ཙམ་བཤད་ཀྱང་བརྡར་ཤ་གཅོད་མི་ཐུབ། སམ་ཊའི་སྟེང་ནས་འབྲི་ཚུལ་སྦྱངས་པ་མཐར་ཕྱིན་པ་ན། སྣག་བུམ། མཚལ་བུམ། སྙུག་མའི་སྨྱུ་གུ་ཆེ་ཆུང་སྣ་ཚོགས། ཤོག་གུ་དཀར་འཇམ་ཅན། ཐིག་ཤིང་། ཞ་སྨྱུག  གྲི་ཆུང་རྣོན་པོ་སོགས་ཡིག་མཁན་ལ་མཁོ་བའི་ཅ་ལག་ཡོ་བྱད་ཚང་བར་གྲ་སྒྲིག་བྱས་ཏེ། དགེ་རྒན་མདུན་ནས་མཐོང་བ་བརྒྱུད་པའི་ཐབས་ཤེས་གང་ཡོད་ཀྱིས་ཇི་ལྟར་བེད་སྤྱོད་ཚུལ་ལེགས་པར་བསླབ་དགོས།

      དེ་ལྟ་བུའི་སྒོ་ནས་བོད་ཡིག་ལ་སྦྱངས་ན། བོད་ཡིག་གི་མཛེས་རྩལ་མཐར་ཕྱིན་པ་ཞིག་འབྱུང་བར་གདོན་མི་ཟ་ལ། དེ་མ་ཡིན་པར་ཐོག་མ་ཉིད་ནས་ཤོག་གུའི་སྟེང་དུ་གསེར་སྨྱུག་དང་ཞ་སྨྱུག་སྤུ་སྨྱུག་སོགས་ལས་སླ་པོ་དང་སྟབས་བདེ་པོ་གང་ཡོད་བཀོལ་ནས་རང་དྲན་འབའ་ཞིག་གིས་བོད་ཡིག་འབྲི་ཚུལ་སྦྱངས་ན་ནི། བོད་ཡིག་གི་མཛེས་རྩལ་མཐར་ཕྱིན་པ་ཞིག་ཡོང་བའི་རེ་བ་ལྟ་ཅི། ས་རྡུལ་ནང་དུ་གྲོག་མ་སོང་ཤུལ་གྱི་སུག་རྗེས་ལྟ་བུའི་ཡིག་གཟུགས་སམ། ན་ཐང་དང་སྤང་ལྗོངས་སུ་གཡག་རྒོད་རྩྭ་ལ་བཀྲམ་པ་ལྟ་བུའི་ཡིག་གཟུགས་དེར་ལག་པ་ངན་ལང་ལ་སོང་ཚར་རྗེས། ད་གཟོད་ཡིག་གཟུགས་ཡག་པོ་ཞིག་སྦྱོང་འདོད་སྐྱེ་ཡང་། ཐོག་མར་གོ་རིམ་དང་ལྡན་པའི་སྒོ་ནས་མ་སྦྱངས་པའི་སྐྱོན་གྱིས་མི་དེ་ལ་ཚེ་གང་པོར་ཡིག་གཟུགས་མཛེས་རྩལ་གྱི་ཡོན་ཏན་ཐོབ་པ་ནི་དཀའ་མོར་གདའ་འོ།   །