ཅོ་ནེ་རྫོང་གིས་བོད་ཀྱི་ཡིག་མཁན་མཐུན་ཚོགས་ཚུགས།

        ཅོ་ནེ་རྫོང་བོད་ཀྱི་ཡིག་མཁན་མཐུན་ཚོགས་དེ་ས་གནས་ཀྱི་རྒྱ་ཆེའི་ཡིག་གཟུགས་ལ་དགའ་མཁན་ཚོས་གྲ་སྒྲིག་ཞིབ་ཚགས་དང་འབད་པ་ཧུར་ཐག་བྱས་ཏེ། རྫོང་ཨུ་དང་རྫོང་སྲིད་གཞུང་། དེ་བཞིན་འབྲེལ་ཡོད་སྡེ་ཚན་གྱི་རྒྱབ་སྐྱོར་ཆེན་པོའི་འོག་དངོས་སུ་དབུ་བརྙེས།

        ཟླ5ཚེས24ཉིན། ཅོ་ནེ་རྫོང་གི་བོད་ཀྱི་ཡིག་མཁན་མཐུན་ཚོགས་དབུ་བརྙེས་པའི་མཛད་སྒོ་དང་མཐུན་ཚོགས་ཀྱི་འཐུས་མིའི་ཚོགས་ཆེན་ཐེངས་དང་བོ་ཅོ་ནེ་རྫོང་དུ་ཚོགས། ཀན་ལྷོའི་བོད་ཀྱི་ཡིག་མཁན་མཐུན་ཚོགས་ཀྱི་ཀྲུའུ་ཞི་སངས་རྒྱས་བཀྲ་ཤིས་དང་སྔར་གྱི་ཀན་ལྷོ་ཁུལ་དམངས་ཆེན་རྒྱུན་ཨུ་ཁང་གི་དྲུང་ཡིག་ཆེན་མོ་གུ་དྲག ཁུལ་རྩོམ་རིག་སྒྱུ་རྩལ་ལྷན་ཚོགས་ཀྱི་ཀྲུའུ་ཞི་གཞོན་པ་ཕྱག་རྡོ་ཚེ་རིང་སོགས་འབྲེལ་ཡོད་འགོ་ཁྲིད་དང་ཆེད་མཁས་པ་གདན་ཞུས་ལྟར་མཛད་སྒོར་ཞུགས།

         ཚོགས་ཐོག་ཏུ་ཅོ་ནེ་རྫོང་བོད་ཀྱི་ཡིག་མཁན་མཐུན་ཚོགས་ཀྱི་སྒྲིག་ཡིག་ལྟར་སྐལ་བཟང་རྒྱ་མཚོ་ཅོ་ནེ་རྫོང་གི་བོད་ཀྱི་ཡིག་མཁན་མཐུན་ཚོགས་ཀྱི་མཚན་འཛིན་ཀྲུའུ་ཞི་དང་། ནུབ་བྱང་མི་རིགས་སློབ་གྲྭ་ཆེན་མོ་བོད་རིག་པ་སློབ་གླིང་གི་གླིང་གཙོ་དགེ་རྒན་ཆེན་མོ་རྡོ་རྗེ་རིན་ཆེན་དང་། སྔར་གྱི་ཀན་ལྷོ་ཁུལ་དམངས་ཆེན་རྒྱུན་ཨུ་ཁང་གི་དྲུང་ཡིག་ཆེན་མོ་གུ་དྲག ཅོ་ནེ་རྫོང་ཨུའི་རྒྱུན་ཨུའམ་རྫོང་སྲིད་ཁྲིམས་ཨུའི་ཧྲུའུ་ཅི་ཚེ་རིང་རྡོ་རྗེ། སྔར་གྱི་ཁུལ་སྲིད་གྲོས་ལོ་རྒྱུས་ཡིག་ཚགས་ཨུ་ཡོན་ལྷན་ཁང་གི་ཀྲུའུ་རེན་མགོན་པོ་དབང་རྒྱལ། ལན་ཀྲོའུ་ཁུལ་གསར་སློབ་འབྲིང་གི་སློབ་གཙོ་གཞོན་པའམ་ཁུལ་བོད་ཀྱི་ཡིག་མཁན་མཐུན་ཚོགས་ཀྱི་ཀྲུའུ་ཞི་གཞོན་པ་སྣང་འབུམ་ཡག་བཅས་མཐུན་ཚོགས་ཀྱི་བློ་འདོན་པར་གདན་ཞུ་བྱས་པ་དང་ཅོ་ནེ་རྫོང་བོད་ཀྱི་ཡིག་མཁན་མཐུན་ཚོགས་ཀྱི་ཀྲུའུ་ཞི་དང་ཀྲུའུ་ཞི་གཞོན་པ། དྲུང་ཡིག དྲུང་ཡིག་གཞོན་པ། ལས་འཛིན་བཅས་ཀྱང་བདམས་ཐོན་བྱུང་།

        དེ་ནས་ཡིག་གཟུགས་འགྲེམ་སྟོན་དང་ཆེད་མཁས་པ་རྣམས་ཀྱིས་ཡུལ་དངོས་ནས་ཡིག་གཟུགས་འབྲི་བ་དང་ཕན་ཚུན་བསམ་བློ་བརྗེ་རེས་ཀྱི་བྱ་འགུལ་སྤེལ།།

（གསར་འགོད་པ་ཀླུ་འབུམ་ཚེ་རིང་གིས་པར་བླངས་ཤིང་གནས་ཚུལ་བཀོད།）