བོད་སྣག་བཟོ་ལུགས་འདི་ཁྱེད་ཀྱིས་ཤེས་སམ།

2022-04-17

སྣག་ཚ་བཟོ་ཚུལ།

        སྣག་ཚ་བཟོ་བ་ལ། ཐང་མ་སྒྲོན་ཤིང་ངམ། གྲོ་ག་སོགས་ཀྱི་ཤུན་པ་སྐམ་པོར་མེ་སྦར་ལ་ཁོག་མ་དྲ་བ་ཅན་དུ་མེ་ལྕེ་བཏོན་པའི་དྲེག་པའམ། མར་མེ་དང་དཔལ་འབར་སོགས་ཀྱི་དྲེག་པའམ། ཐ་མ་སླང་དྲེག ཕ་བ་སྒོ་སྒོ་སྐམ་པོ་ཞལ་འདག་གིས་གཡོགས་ནས་བསྲེགས་པ་ལྟ་བུ་དེ་དགོས་རྒྱུའོ། དེ་ལ་སྤྱིན་གྱི་དྭངས་མ་བསྐོལ་བ་གྲང་ནས་ཆགས་ཚེ་ལྕེས་མི་ཕིག་ཙམ་སྦྱར་བ་ཐང་རྐྱལ་དུ་མཉེ་བསྲུབ་ཡང་ཡང་བྱེད་ཅིང་། རླན་དང་བྲལ་ན་ཆུས་བྲན་ཏེ་ཡང་ཡང་ལྡེ་གུ་བྱས་ནས་འདུལ་བའོ། འདིར་ཁ་ཅིག་ལྷང་ཚེར་ཐང་རྐྱལ་དུ་མཉེ་བསྲུབ་བྱས་པས་གཞི་བྱས་ནས་དྲེག་པ་སོགས་ཀྱིས་བསྒྱུར་བའང་བྱེད་སྲོལ་ཡོད། སྣག་ཚ་དེ་ལ་མཉེ་བསྲུབ་དུས་སམ། སླད་ནས་ཀྱང་རུང་སྟེ། པི་ལིང་ཀ་ཀོ་ལའི་ཆུས་སྦངས་ན་དགུན་མི་འཁྱག ག་བུར་ཏང་ཀུ་ཙན་དན་དཀར་པོའི་ཆུས་སྦངས་པས་དབྱར་མི་རུལ། གླ་རྩི་དང་གི་ཝང་གི་ཆུས་ཕབ་ན་ཤིན་ཏུ་རྒྱུག་ཅིང་མི་འཆད། རྒྱལ་མོ་ཀ་ར་དང་རྒྱ་སྐག་གི་ཆུས་ཕབ་ན་ཁ་དོག་སྣུམ། ལི་ཤི་རུ་རྟ་ག་པུར་རྒྱ་སྤོས་སྤང་སྤོས་ཏང་ཀུ་ཤུ་མོ་ཟ་ཨར་ནག་རྣམས་ཀྱི་ཆུས་ཕབ་ན་དྲི་བཟང་། ཡོས་ཚིག་ཁུ་བ་དང་བེ་ཁྲག་གཉིས་ཀྱི་དྭངས་མ་བླུགས་ན་དངུལ་འོད་འཚེར། སྤྱི་བཞུར་ཁུ་བས་མཐིང་མདངས། སྐྱེར་ཤུན་ཁུ་དྭངས་བླུགས་ན་གསེར་མདོག སྐག་ཁུས་ཟངས་མདོག་འབྱུང་ཕྱིར་གང་འདོད་བསྲེ། དམ་ཆེས་པས་མི་རྒྱུག་ན། དར་མཚུར་རམ་ཚྭ་ལ་བསྲེགས་ཐལ་ཉུང་ཙམ་བཏབ་། སླ་ན་ནས་སམ་སྲན་མའི་རྡོག་པོ་བཏབ་པས་དེས་ཆུ་འཐུངས་ནས་གར་བར་ནུས། སྤྱིན་མེད་ན་གྲོ་ནས་ཀྱི་ཡོས་ཁུའམ། ཐང་ཁྲག་སོགས་དམ་དུ་སེམས་ཅན་རྗུད་པའི་ཆུ་སེར་དྭངས་མ་ཁྲག་མེད་པ་སོགས་བསྲེས་པས་འོད་དང་ལྡན་ཞིང་དགུན་འཁྱགས་དུས་ཕྱིར་འཇིབ་མི་ཡོང་བཟང་ཡང་། རླན་དང་ཕྲན་ན་རྐྱེན་ཆེར་མི་འཁྱགས་སོ། །བུལ་ཏོག་ཇ་བསྐོལ་ནང་བཏབ་ན་འཇུ་བ་དེ་སྣག་ཚའི་དམ་ཚི་མཆོག་གོ་ཞེས་ཀྱང་བཤད། གཞན་ཡང་སྣག་ཚ་བཟོ་བའི་རྒྱུ་དགུ་ཡང་བཤད་དོ། །དང་པོ་དྲེག་པ་ལས་སྦྱར་ཚུལ་ནི། སྣུམ་ནག་གི་དྲེག་པ་བུང་ཆེ་བར་འོད་ཀྱང་འདུལ་ཅུང་དཀའ། ཀྱི་ལྕེའི་དྲེག་པ་འདུལ་སླ་ལེགས་ཀྱང་འོད་ཆུང་། ཤིང་དྲེག་ལེགས་ལ་བོང་ཆེའོ། །དམར་ཆེན་རྩེ་བའི་དྲེག་པ་མདོག་ལེགས་བོང་ཆེ་འདུལ་སླ་ཡང་རུལ་སྐྱེན། དེའི་ཕྱིར་དགུན་དུས་དམར་ཆེན་རྩེ་དྲག་དང་། སྣུམ་དྲེག་ཀྱི་ལྕེའི་དྲེག་པ་མཉམ་སྦྱར་བྱས་ན་མདོག་ལེགས་འདུལ་སླ་བོང་ཆེ་བའི་དགོས་པ་ཡོད། དེ་ལ་མཐིང་ག་འདོད་ན་རམས་ཀྱི་ཁ་ཆུ་ནག་པོ་དང་སྤྱི་བཞུར་ཁུ་བ། སྔོ་སྐྱ་འདོད་ན་སྤྱི་བཞུར་ཁུ་བ་ཁོ་ན། དངུལ་མདོག་འབྲས་དཀར་དང་མ་ནུ་རུ་རྟའི་ཁུ་བ་ཆ་མཉམ་མང་དུ་བཏང་སྟེ་ཡུན་རིང་ཉི་མར་མཉེས་པས་འོང་། དམར་འདངས་འཚེར་བར་འདོད་ན། སྣུར་ཐག་ཆོད་ཁར་གཙོད་ཁྲག་སྦངས་པའི་དྭངས་མ་ཅུང་ཟད་བཏང་ནས་མེ་ལ་མི་བརྟེན་པར་ཉི་མར་མཉེས་པས་འོང་། ཤིན་ཏུ་གནག་ཅིང་འོད་ཆེ་བར་འདོད་ན་ལ་ཆུ་ཅུང་ཟད་བཏང་སྟེ་ཆུ་གྲང་མི་བླུག་པར་དྲོད་ཁོ་ནར་བརྟེན་པས་འོང་། དེ་རྣམས་གང་བྱེད་ཀྱང་མ་ནུ་རུ་རྟའི་ཁུ་བ་བཏང་བས་འཇམ་ལ་རྨེ་བའི་གནད་ཡོད་དོ། །དམ་གྱི་སྤྱིན་ཆུའི་ཚབ་འབྲས་ཁུ་ཉག་གཅིག་གིས་བྱས་ན་འདྲེན་བདེ་སྐམ་མགྱོགས་དབྱར་མི་རུལ་ལོ། །སུག་ཆུའི་དྭངས་མ་དང་སྤྱིན་ཆུ་ཅུང་ཟད་བཏང་ན་འོད་ཆེ། སྤྱིར་ཡུན་རིང་དུ་མཉེས་པ་དང་། མཉེ་དུས་སྐོར་ཕྱོགས་ངེས་མེད་དུ་བྱས་ནས་མི་འཆད་པ་འདྲེན་བདེ་ལ་གནག་སྙིང་ཉུང་། འོད་ཆེ་བའི་གནད་ཡོད་དོ། །གཉིས་པ་མེ་ཏོག་ལས་བཟོ་ཚུལ། སྣུམ་གྱི་མར་མའི་རྩེར་ཆགས་པའི་དྲེག་པ་ནག་པོའི་མེ་ཏོག་ནི་སྣུམ་དྲེག་དང་འདྲ། མེ་ཏོག་གཞན་འབྲས་ཁུར་ཧ་ལོ་སྨུག་པོ་དང་། རྒྱ་ལྕམ་མེ་ཏོག་གཉིས་སོ་སོར་སྦངས་ལ་ནག་པོར་གྱུར་བ་དང་ལྷན་ཅིག་བསྲེ། དེ་ལ་ཚོས་ཁུ་དང་མཚུར་ནག་ར་ཁྲག་ཅུང་ཟད་བཏང་ནས་བྲིས་པས། དང་པོ་སྣག་ཚ་འཆིང་ཁ་སླ་འདྲེན་བདེ་བ་ཞིག་འབྱུང་། བྲིས་ཟིན་ནས་ལོ་རེ་བཞིན་དག་འགྲོ། དེ་ནི་ཚ་བུལ་སོགས་མ་བཏང་བར་མེ་ཏོག་ལ་བྱེད་ཚུལ་ལོ། གསུམ་པ་ས་ལ་བྱེད་ཚུལ་ནི། ས་སྨྱག་གཤིན་པོ་སྤྱིན་ཆ་གསུམ། ཞིབ་ཟན་ཆ་གཅིག་རྣམས་བསྲེས་ལ་གོང་དུ་བྱ། སྐམ་ཐག་ཆོད་པ་དང་མེ་ལ་བཙན་བསྲེག་བྱ། དམར་པོར་སོང་བ་དང་། དེ་འཕྲལ་གཏུན་ཁུང་མེ་ཐུབ་ཀྱི་ནང་དུ་མཉེས་ནས་ཅུང་ཟད་དྲོ་བ་དེ་ལ་ཉེ་ཤིང་མ་ནི་དྭངས་མ་ཅུང་ཟད་དང་། སྤྱིན་ཆུ་བླུགས་ལ་ཆུ་ཡོད་ན་མཆོག་ཏུ་བཟང་། མེད་ན་ཡང་ཡུན་རུང་མཉེས་པས་མདོག་ནག་བོང་ཆེ། རྩེ་འཐུབ་ཞལ་བ་ཐབ་ཚང་དང་ཐབ་ཁ་ལ་བྱུག་པའི་སྣག་ཚ་མཆོག་ཡིན་ནོ། བཞི་བ་ཕ་བ་སྒོ་སྒོ་ལས་བྱེད་པ་ནི། བ་མོ་དུ་གོལ་ཡང་ཟེར། དེ་སྐྱེས་བྲལ་གྱི་ཁྲེས་པོ་འཐུས་ལ། མེ་ལ་བཙན་བསྲེག་བྱ། དམར་ཏིང་ངེ་བ་དེ་ཆུ་ལ་བསྒྱུར། དེ་བཏོན་ནས་གཏུན་ཁུང་དུ་མཉེས་སྐམ་ཐག་ཆོད་ནས་བརྔོས་ལ་ཉེ་ཤིང་མའི་ཁུ་བ་དང་སྤྱིན་ཆུ་བླུགས། ཡུན་རིང་མཉེས་པས་མདོག་ནག་བོང་ཆེ་བ་འོང་སྟེ། འདི་ནག་རོ་པགས་ལ་བྱུག་པའི་འོས་ཡིན་ནོ། ལྔ་བ་ལྕི་བ་ལས་བཟོ་ན། བ་ལང་གི་ལྕི་བ་སེར་ཁ་མ་བཏུས། དེ་ཡང་སྔ་ལྕི་སེར་ཁ་མ་ཡིན་ན་བཟང་། དེ་མེར་བསྲེགས་དམར་པོར་སོང་དུས་ཆུ་ལ་བསྐྱུར་ནས་བཏོན། དེ་ནས་ཞིབ་ཟན་མཐེབ་སྐྱུ་སྐམ་པི་བསྲེག་པ་ཆུར་བསྒྱུར་བ་ཅུང་ཟད་བསྲེག་ཏེ། གཏུན་དུ་བསྒྱུར་ཚུལ་གོང་ལྟར་བྱས་པས་མདོག་ཤིན་ཏུ་གནག་པ་འོང་སྟེ་ནག་རྩི་བྱ་བའི་འོས་སོ། དྲུག་པ་སེར་ཤ་ལ་བྱེད་ཚུལ། དབྱར་ཁའི་སེར་ཤ་ཆད་སླར་འཛུད། བདུན་པ་ཙི་དྲ་ཀའི་འབྲས་བུ་སྨིན་པ་དེ་རཝལོན་པ་ཡིན་ན་ཁབ་ཀྱིས་གཙགས་པའི་ཁུ་བ་ལྕགས་སྣོད་དུ་བླང་སྐམ་པོ་ཡིན་ན་ཆོལ་ཙམ་བརྡུང་ལ་ལྕགས་སྣོད་དུ་ཆུར་སྦངས། ཉི་མར་འདུལ་བས་ཁུ་བ་སྨུག་ནག་འབྱུང་བ་ལ།ཐར་ནུ་དང་མཚུར་ནག་གི་ཁུ་བ་དྭངས་མ་བླུགས་ནས་བྲིས་པས་སྣག་ཚ་མཆིན་ཁ དྲུག་སིང་ངེ་བ། འདྲེན་བདེ་མོ་ཞིག་འབྱུང་ ། བརྒྱད་པ་ནི་དུད་འགྲོའི་རྒྱུངས་བཁྲག་དང་རྩ་དང་ལྐོག་པ་མེད་པ་ཞིག ཚོན་ཙམ་རྫ་ཕོར་འཇམ་པོའི་ནང་དུ་བླུག   དེ་ལ་གོང་གི་དྲེགས་པ་རྣམས་གང་ཡོད་བཏབ་ལ་མཉེ། ཆུ་འཇམ་ཙམ་བླུག གར་སླ་རན་པོར་བྱུང་བ་དང་བྲིས་པས། འདྲེན་བདེ་མོ་རང་མིན་པའི་མདོག་ལེགས་པོ་གཅིག་འོང་། འདི་མེ་ཉི་མི་ཕོག་པའི་ཞལ་བ་སོགས་ལ་བྱུག་ན་ལེགས། རྒྱུངས་བ་ཆེ་ན་ཀོག་འོང་བས་ཚོད་ཟིན་པར་བྱའོ། དགུ་བ་ལ་ཕུག་བརྡར་གསེབ་དྲེག་པ་གང་འདོད་ཅིག་བླུགས། ལག་པས་མཉེས་ལ་ཆུ་གཙང་ཅུང་ཟད་བླུགས་ཏེ་བཙིར་བས་འཕྲལ་དུ་སྣག་ཚ་འབྱུང་སྟེ། མདོག་ལེགས་པོར་རང་མིན་ཡང་འདྲེན་ཤིན་ཏུ་བདེ་བ་གཅིག་འོང་། ཡུན་རིང་ན་ཅུང་ཟད་ཡལ་འགྲོ་བ་ཡིན། འཕྲལ་དུ་སྣག་ཚ་དགོས་ན་འདི་དང་རྒྱུངས་བ་ལ་བྱེད་པ་གཉིས་མགྱོགས་སྣག་ཡིན་ནོ། སྣག་ཚ་སྦང་ཚུལ་སྣག་བུམ་གྱི་ནང་བསྲོས་ལ་ཆུ་བླུག དེ་ནས་གྲང་བ་དང་ཆུ་ཐིག་བླུགས་པས་གཞན་གྱིས་བྲིས་ཀྱང་མི་འོང་ རང་གིས་འབྲི་ན་སྣག་བུམ་བསྲོས་ལ་ཚ་ལའི་ལྦུ་བ་བླུགས་པས་འབབ་པར་འགྱུར་རོ། མཚལ་འདུལ་ལུགས་འོག་ཏུ་ཚོན་སྦྱོར་སྐབས་སུ་འཆད།


       


阅读34
分享
写下你的评论吧