ཡིག་འབྲི་བ་ཤ་བོ་རྡོ་རྗེའམ་འཁྱག་དོ་རྡོའི་མཚམས་སྦྱོར་མདོར་བསྡུས།

     ༄༅།།ཤ་བོ་རྡོ་རྗེ་ནི་གཅན་ཚ་རྫོང་གཅན་ཚ་ཐང་ཡུལ་ཚོ་གླེ་གཞུག་སྡེ་བ་ནས་སྐྱེས་ཤིང་། ཆུང་དུས་སློབ་ཆུང་གི་སྒོ་ཐེམ་རྡོག་པས་མནན་ཏེ་བོད་ཀྱི་དབྱངས་གསལ་སོ་བཞིའི་སྦྱོར་ཀློག་ལ་ཐོག་མར་བསླབ། དེ་ནས་རིམ་བཞིན་སློབ་འབྲིང་ལ་ཡང་ཟུར་ཞུགས་ཀྱིས་བོད་ཀྱི་བརྡ་སྤྲོད་གཙོས་པའི་རིག་གནས་ལ་སྦྱངས། རྗེས་སོར་སུམ་རྟགས་དག་གསུམ་དང་སྙན་ངག་ལ་ཡང་ཚད་ལྡན་པའི་དགེ་རྒན་གྱི་མདུན་སར་བཅར་ནས་ཟུར་སྦྱོང་བྱས་ཏེ་བོད་རང་གི་ཐུན་མིན་རིག་གནས་ཀྱི་རྨང་གཞི་ལེགས་པར་གདིང་བའི་སྐལ་བ་ཐོབ།   ཉིས་སྟོང་བཅོ་བརྒྱད་ལོར་བཀའ་བསྟན་གསེར་བྲིས་གླིང་གི་ཡིག་གཟུགས་གསབ་སྦྱོང་ལ་ཞུགས་ནས་ཟླ་ངོ་དྲུག་ལྷག་ལ་བླ་བྲང་ཡིག་གསར་དུ་གྲགས་པ་དྲུང་ཡིག་སྨོན་ལམ་གྱི་ཡིག་གཟུགས་ལ་ཆེད་སྦྱོང་བྱས། དེ་ནས་རིམ་བཞིན་སེམས་ཀྱི་བརྟན་པ་བོད་ཀྱི་ཡིག་གཟུགས་སྒྱུ་རྩལ་ལ་བཏིམས་པའི་འདུ་ཤེས་ཀྱི་དྲན་པ་སྔོན་དུ་བཏང་ནས་གསེར་བྲིས་ལ་སྦྱངས་ཤིང་། སྐྱབས་འགྲོ་དང་སྒྲོལ་མ། མཚན་བརྗོད། ཛམ་ནག   བསམ་པ་མྱུར་འགྲུབ་མ། བཀའ་འགྱུར་པོད་གཉིས། ཁྱུང་བྲིས་སུ་བཞེངས་པའི་མ་ཎི་བཀའ་འབུམ། དེ་མིན་བཀའ་འགྱུར་གྱི་དབུ་ཤོག་མང་ཆེ་བ་བྲིས་པས་ཡིག་གཟུགས་ཀྱི་བྱང་ཚད་ཀྱང་གང་འཚམ་ཞིག་ལ་སླེབས་ཤིང་། དེ་མིན་གཅན་ཚ་རྫོང་སྲིད་གཞུང་གི་བཀོད་སྒྲིག་འོག ཡིག་གཟུགས་འགྲན་སྡུར་ཁྲོད་ཨང་དང་བོ་ཐོབ་ཅིང་། ཐེངས་འགར་ཨང་གཉིས་པ་དང་གསུམ་པ་སོགས་ཡིག་གཟུགས་ཀྱི་སྡེིངས་ཆ་ཡང་ངེས་ཅན་ཞིག་ཟིན་ཡོད་ཀྱིས་བཤད་ཆོག དགེ་རྒན་བསྟན་གོ་དང་ལྷུན་གྲུབ་རྒྱ་མཚོ། ཀན་ལྷོའི་ཡིག་མཁན་རྒན་རྡོར་བྷ་སོགས་ཚད་ལྡན་དགེ་རྒན་དུ་མའི་མདུན་ནས་དྲུང་ཡིག་སྨོན་ལམ་གྱི་གཟུགས་རྒྱུན་ཙམ་མ་ཡིན་པར་དབུས་ཀྱི་སྙེ་ཡིག་དང་།   ཁྱུང་བྲིས། དབུ་མེད་ཚིགས་རིང་ཐུང་གཉིས། གཞན་ཡང་ལཉྫ་སོགས་ལ་སྦྱངས་པ་མི་དམན་པ་བྱེད་བཞིན་ད་ལྟའི་ཆར་བཀའ་བསྟན་གསེར་བྲིས་གླིང་དུ་གསེར་ཡིག་ལ་སློབ་སྦྱོང་བྱེད་ཞོར་བོད་ཀྱི་ཡིག་གཟུགས་སྒྱུ་རྩལ་ལ་འབད་པས་སྦྱོང་མུས་སུ་ཡོད་དོ།།